Lugeetap Paulo agobo Icheek
Alugei Paulo eng' saaet agobo che iyanen che tomo koger, amache si koroote icheek eng' Kristo, ama si konamak eng' utaatyet ne puch, anan ng'atuutigap amitwogik, anan ng'ang'utigap malaikaik. Siraatap lelutik che agaigai icheek, kagorat eng' tabilit; kagong'eetu Kwandanyo icheek kobooto Kristo.
2 1Amache si onai ole alugei agobo okweek miising', ak agobo che mi Laodikia, ak tugul che ma kituiyegei tai ak tai, 2si kogaigai mugulelwekwak, kotuiyechigei eng' chamyet, ak konyoor mogornatosyek tugul che po iman ne nyiitaat ak ng'omnateet, naetap kiit ne ki kiuny ne po Kwandanyo, ne ko Kristo, 3ne unotin eng' ineendet konoraik tugul che po utaatyet ak naet. 4Amwae niito si ma koberberok chii age tugul eng' ng'aleek che leelach. 5Agot ngot ma ami kobooto okweek eng' poorto, ami kobooto okweek eng' kabuusennyu, ak abaibai keere kaboorunetap okweek ne karaaran ak gimnatetap kayaneng'wong' eng' Kristo.
Orootegei ak Keteechakei eng' Ineendet
6Nooto anyun, ko uu ye kaonam Kristo Jeso Kiptaiyat, obendi eng' ineendet, 7orootegei ak keteechei eng' ineendet, ogimit eng' kayaneet ko uu ye ki kineeti okweek, onyiitaat kongoi.
8Oriibegei si ma konamak chii age tugul eng' utaatyet ak berbernatet ne puch, ko uu kaneetisyetap piik, ko uu kaneetisyosyek che po tai che po ng'wony, ama ko uu Kristo. a a v8 Kaneetisyosyek che po tai che po ng'wony: kimnatosyek ak atebutyosyek che po tai che riibei piik eng' otwoknateet ye mami Kristo. 9Amu menyei eng' ineendet nyiennyi Kamuktaindet tugul eng' poorto, 10ak eng' ineendet ko kaginyiitok okweek, ineendet ne ko metit ne boi laitornatet age tugul ak kimnateet. 11Eng' ineendet kimuratan okweek kora, kamuratanet ne ma kiyae eunek, eng' kong'etosyet poortap poorto, kamuratanet ne po Kristo. b b v11 Kamuratanet ne ma kiyae eunek: woletap muguleldo ne po kabuuset, ama kiyomnatet ne po poorto. 12Kaginik kobootennyi eng' kabatisanet, ole king'eet okweek kora kobootennyi eng' kayaneet ne po kimnateetap Kwandanyo, ne ki ing'eetyin ineendet eng' meet. 13Ki ome okweek eng' tengekwogikwok ak eng' poortang'wong' ne ma kimuratan, ago kagiisobok Kwandanyo kobootennyi, konyoechech kaat tengekwogikyok tugul, 14koisto sireetap pesen, kobooto ng'atuutikyik, ne ki agaigai echeek. Kagoisto niito, koriut eng' kirugiit. 15Kaang'etchi gimnateet laitorinik ak kimnatosyek, ak koung'atwech icheek eng' taitap piik, koluulach icheek eng' ineendet.
16Nooto anyun, mat korwoogwok chii age tugul agobo amitwogik anan eeyet, anan igoorto, anan leelutap arawet, anan sabato. 17Chu ko urwetap tuguuk che ki nyoonei, ago iman ko po Kristo. 18Mat koistoyok melekto chii age tugul, eng' boiboiyennyi eng' ming'inetap kei ne po lembech ak kogutung'jinetap malaikaisyek, kochut eng' ng'ang'utik che ki keer, komeegei puch eng' kererwegap metinnyi ne po poorto, 19ak ma namei metit, ne eng' ineendet koeet poorto age tugul, kebai ak kenamnyo eng' ole tuiyechin ak chorwenik, koeet eng' eetet ne punu Kwandanyo.
20Ngot ko kagome okweek kobooto Kristo eng' kaneetisyosyek che po tai che po ng'wony, amu nee anyun, ko uu ngot otebee eng' ng'wony, oming'injigei ng'atuutikyik? 21“Amonam, amochamchami, amomin”? 22Chu tugul ko petos ye kaboisyee, amu rootei eng' ng'atuutik ak kaneetisyosyek che po piik. 23Ng'atuutichu ko tinyei togeetap utaatyet, eng' kogutung'jinet ne ki kigoonu icheek, ak ming'inetap kei ne po lembech, ak yaachetap poorto, ago ma tinyei boisyet age tugul koeesyo machoogap poorto.