Paul puko la rha thita
Paul-e pü mhüjülü ngo kemoko mülüyimi la kevekesu rha thi, uko Khrista lü kemelü tha melü keto nü de, thüma mhashe po mu kengomu kecürü, atalha thezho, mori tüyo choyi zümho celü phapü thi keto nümo. Uko züde thokemeta uzho ureleko tsühi cross yo gu kevala keta; ha Poe uko Khrista zü rhüla süta.
2 1I neko la, Laodicea lü keba uko la, mu athi apho mhüjülü ngo kemoko metü la, i kevekesu rha thi keba hio neko seyi keto na i kemenyü. 2Uko melü nüyi, kükhrü lü hunehu metü po thiyi, mu zhochü mu mhashe ceneko metülü vori ketola; hio ha Po kemekhrü thino, Khrista, se keyi ketola. 3Pü lü mhashe mu se keyi ceneko metü kemekhrü de bazo. 4Sopü rie makro thechu lü neko cürü yomo ketola, i hio posüzo. 5I apho lü neko ropü bazoshori, vele rüpü lü i neko mu bazo; neko ketsopü mezü ba mu neko Khrista lü kemelü tha melü ngode i nüzo.
Pü lü me pokra mu ce khüyi
6Therho, neko Niepoo Khrista Jisu ngoyi kesübi, pü lü hüte. 7Pü lü me pokralü mu ce khüyi, neko metha sü kesübi kemelü lü tha melü, mu themo po de phayi.
8Mhape menu sürhü shuyite, molize sopü rie thüma mhashe po mu kengomu kecürü kesu lü, thüma zhoko kesübi, cejü zho cebi kesübi, Khrista kesübi mo, neko phapü thi keto. a a v8 Cejü zho cebi: hiko Khrista pülümo thüma phapü thi keba rüpü keku mu jükho zho kerao ketako zo. 9Kekrelamori pü lü Jihova swüpü metü uthi upho lü bazo. 10Mu pü lü neko vetsütso thita, Pu keku keneko metü pitha zo. 11Pü lü neko sheri yikerü thita—yikerü hio be lü thi kemo, uthi upho khava—Khrista yikerü zo. b b v11 Be kemolü thi kesü yikerü: hio uthi upho zhoreleko mo, vele melü rüpülü rüderüle thi keba zo. 12Neko baptaiz lü pü mu khi khrüva; mu pü kesalü rhüla süta-o ha Po keku lü kemelü celü, sülü neko sheri pü mu rhüla süta. 13Neko kephoma lü mu yirü kemo uthi upho lü kesa thita, vele ha Poe pü mu neko rhüyi thita, ha phoma metü ha ce kejo vazo. 14Ha metsu ti ba zhoko mu ha poko lesi khi va, Pue hio khava, cross lü dzü metazo. 15Pue keku keneko metü keku khava, mu methi mhüjülü uko mejo mengosü, pü lü uko metü khapü thitazo.
16Süla themu, hezo kekra, kereshüce, khri müthu, mori sabbath la sopü rie neko mezi tahite. 17Hiko kevori keto thino mhakhri zo, vele jüthopü hio Khrista zo. 18Sopü rie kenyümhü rünu mu tüyo choyimi reshü lü nü de, pü ngo ba zümho ce reni de, pü uthi upho lüdo lü mhapüri mozo sheri ukhipü kerekrü de, neko zhokhro khi tahite. 19Mu pitha ce reni mo, pü celü upho metü, u kerüko mu ukelü urolü celü mhati mu metü po thi tade, ha Po celü mazhoizo.
20Neko Khrista mu cejü zho cebi ce kesa thita lize, dipüla neko cejü lü bata sheri, pü zhoko dzüzü lü bata? 21“Süta tahite, mhati tahite, meta tahite”? 22Hiko metü süo lü rütato, kekrelamori hiko thüma po kha mu metha celü vozo. 23Hiko zhoko mhashe bi ngozo—utho thi kesü reshü, kenyümhü rünu, uthi upho meprü sa keti—vele uthi upho mhakemeho khapü lü kepra kemo.
