Me basika na mukanda
Dibuku

Mbote na bantu ya Kolose

Polo ke zangula bumfumu ya Klisto na zulu ya bima nyonso, mpe ke kebisa na yina me tadila malongi ya mpamba yina ke zola kukulumuna yandi.

Kapu 1.

Ni munu Polo, ntumwa ya Yesu-Klisto mutindu Tata ya beto zolaka, mpe Timote mpangi ya beto, Na bampangi ya longo mpe ya kwikama na kati ya Klisto, bayina kele na Kolose, beto ke fidisa mukanda yayi: Bika ti Tata ya beto kupesa beno kizunu mpe ngemba.

Matondo samu na Kiminu ya Beno

Ntangu nyonso, beto ke vutula matondo na Tata ya beto, Tata ya Mfumu ya beto Yesu-Klisto, mpe beto ke sambila samu na beno, samu ti beto me kuwa kiminu ya beno na kati ya Yesu-Klisto, mpe luzolo yina beno kele na yawu samu na bantu nyonso ya longo, samu na kivuvu yina ba me bumba samu na beno na mazulu, kivuvu yina beno me kuwa dezia na nsangu ya kyeleka, yina kele Nsangu ya Mbote, Nsangu yina me kuma na beno, mpe yawu ke buta bambuma mpe ke kula na yinza ya muvimba, mutindu yawu ke sala na kati ya beno, katuka kilumbu yina beno kuwaka mpe bakulaka kibeni bumbote ya Tata ya beto. Beno longokaka yawu na sika ya Epafrase, kisadi-mpangi ya beto ya luzolo, muntu ya kwikama yina ke sadila Klisto samu na beto, mpe yandi me zabisa beto luzolo ya beno na kati ya Mpeve ya Longo.

Na yina, katuka kilumbu yina beto kuwaka, beto me bika ve na kusambila samu na beno. Beto ke lomba ti beno kufuluka na luzabu ya luzolo ya yandi, na ndwenga mpe mayela nyonso ya Mpeve ya Longo, samu ti beno kutambula na mutindu yina me fwana na Mfumu, mpe beno kusepedisa yandi na mambu nyonso, beno kuta bambuma na konso kisalu ya mbote, mpe beno kula na luzabu ya Tata ya beto, beno kukuma ngolo na lulendo nyonso na nzila ya ngolo ya yandi ya nkembo, samu na beno kukanga ntima mpe kuvwanda na mvibudulu na kyese nyonso, beno kuvutula matondo na Tata ya beto, yina me kumisa beno bantu ya me fwana samu na kuzwa ndambu na difwa ya bantu ya longo na kati ya nsemo. Yandi katulaka beto na luyalu ya kitombe, mpe kotisaka beto na Kimfumu ya Mwana ya yandi ya luzolo, na kati ya yandi, beto kele na nkudulu, mpe kuzwa mulemvo ya masumu.

Mwana Kele na Zulu ya Bima Nyonso

Yandi kele kifwani ya Tata ya beto yina ke talanaka ve, mpe Mwana ya ntete na zulu ya bima nyonso yina Nzambi yidikaka. a a v15 Mwana kele kifwani ya kutalana ya Tata yina ata muntu mosi ve me tala na ntangu mosi. Kutala Yesu kele kutala mutindu Tata ya beto kele. Samu ti bima nyonso salamaka na kati ya yandi: bima ya mazulu mpe ya ntoto, bima yina ke talanaka mpe yina ke talanaka ve, bakiti ya kintinu, bamfumu, bangolo, mpe bimfumu. Bima nyonso salamaka na nzila ya yandi mpe samu na yandi. Mpe yandi kele na ntwala ya bima nyonso, mpe bima nyonso ke kangamaka kintwadi na kati ya yandi. Yandi kele ntu ya nzutu, yina kele dibuundu. Yandi kele mbandukulu, Mwana ya ntete na kati ya bafwa, samu ti yandi kuvwanda ya ntete na bima nyonso. Samu ti Tata ya beto sepelaka ti bunene nyonso ya yandi kuzinga na kati ya Mwana, mpe na nzila ya yandi, yandi vutulaka ngwisani ya bima nyonso na yandi mosi, bima ya ntoto to bima ya mazulu, na kusala kizunu na nzila ya menga ya kulunsi ya yandi.

Na ntama, beno vwandaka ya kukabuka na Tata ya beto, mpe beno vwandaka bambeni na kati ya mabanza ya beno, samu na mavanga ya beno ya yimbi. Kasi ntangu yayi, Tata ya beto me vutula ngwisani na beno na nzila ya nzutu ya kimuntu ya Klisto, na nzila ya lufwa, samu na kutula beno na ntwala ya yandi mutindu bantu ya longo, ya kusungama, mpe bantu yina muntu lenda semba ve, kana beno tatamana kibeni na kati ya kiminu, beno kele ya kutungama mpe ya ngolo, mpe beno katuka ve na kivuvu ya Nsangu ya Mbote yina beno kuwaka, Nsangu yina ba me zabisa na kati ya bima nyonso yina kele na nsi ya zulu, yina munu Polo, mu kumaka kisadi ya yawu.

Bampasi ya Polo samu na Dibuundu

Ntangu yayi, mu ke na kyese na kati ya bampasi ya munu samu na beno, mpe na nzutu ya munu, mu ke lungisa yina me bikana na bampasi ya Klisto, samu na nzutu ya yandi, yina kele dibuundu. b b v24 Polo ke tuba ve ti kulunsi vwandaka ya kulunga ve. Yandi ke tuba ti bampasi ya yandi mosi ke landisa kisalu ya Klisto ya kuvuukisa bantu na nzila ya dibuundu, yina kele nzutu ya yandi. Mu kumaka kisadi ya dibuundu na nzila ya kisalu yina Tata ya beto pesaka munu samu na beno, samu na kuzabisa mbote-mbote mambu ya Tata ya beto. Yawu kele kinsweki yina vwandaka ya kubumbama na bantangu mpe na mabuta nyonso, kasi ntangu yayi yawu me monikina na bantu ya yandi ya longo. Tata ya beto zolaka kumonisa na bawu kimvwama ya nkembo ya kinsweki yayi na kati ya bantu yina kele ve ba-Zwife. Kinsweki yina kele Klisto na kati ya beno, yina kele kivuvu ya nkembo. Beto ke zabisa yandi, beto ke kebisa mpe ke longisa muntu nyonso na ndwenga nyonso, samu na kutula muntu nyonso ya me yela na kati ya Klisto. Samu na dyambu yayi, mu ke sala kisalu ngolo, mu ke nwana na ngolo nyonso yina Tata ya beto ke pesaka munu, ngolo yina ke sala kisalu na kati ya munu na lulendo nyonso.