Wowɔ he?

Anwiinwii a ɛda hɔ pefee sɛ yɛn Agya te sɛ nea ogyina akyirikyiri bere a ahantanfo de atɛw rekyere ahiafo, na wɔka kyerɛ wɔn ho sɛ obiara nhwɛ. Odwontofo no si so dua sɛ ohu, na ɔsrɛ no sɛ ɔnyɛ biribi sɛ agyanfo boafo.

Ti 10.

Yɛn Agya, adɛn nti na wogyina akyirikyiri? Adɛn nti na wode wo ho sie wɔ ɔhaw bere mu?

Ɔbɔnefo no wɔ nʼahantan mu ti ohiani denneennen; ma abɔnefo no nkɔtɔ pɔw a wɔabɔ no mu. Efisɛ ɔbɔnefo hoahoa ne ho wɔ nea nʼakoma pɛ ho; onipa anibere no dome yɛn Agya na ɔpo no. Ɔbɔnefo no wɔ nʼahantan mu, ɔrenhwehwɛ no; nʼadwene nyinaa ne se, “Onyankopɔn nni hɔ.” ^a Nʼakwan yɛ yiye bere nyinaa; wʼatemmu wɔ soro, ɛkorɔn sen no koraa; ɔbu nʼatamfo nyinaa animtiaa. Ɔka wɔ nʼakoma mu se, “Wɔrenwosow me da; awo ntoatoaso kosi awo ntoatoaso merenhyia ɔhaw biara.”

Nʼano ayɛ ma nnome ne nnaadaa ne nhyɛso; ne tɛkrɛma ase na ɔhaw ne amumɔyɛ wɔ. Ɔbɔ ɔkyɛ wɔ nkuraa ho; ɔfiri ahintawee mu kum wɔn a wonni fɔ, nʼani di wɔn a wonni boafo akyi kokoam. Ɔbɔ ɔkyɛ kokoam te sɛ gyata wɔ ne nwura mu; ɔbɔ ɔkyɛ sɛ ɔbɛkyere ohiani, ɔde nʼasau kyere ohiani twe no kɔ. Wɔn a ɔkyere wɔn no, wɔpɛtɛ, wɔbubu ase; wɔn a wonni boafo hwe ase nʼahoɔden nti. Ɔka wɔ nʼakoma mu se, “Onyankopɔn werɛ afi; ɔde nʼanim asie; ɔrenhu da.”

Sɔre, yɛn Agya! Ma wo nsa so; mma wo werɛ mfi wɔn a wɔrehu amane no. Adɛn nti na ɔbɔnefo no po yɛn Agya, na ɔka wɔ nʼakoma mu se, “Worembisa me ho asɛm”? Nanso wohu ampa, efisɛ wohyɛ ɔhaw ne awerɛhow nsow, sɛ wobɛfa de ahyɛ wo ankasa wo nsa mu. Nea onni boafo de ne ho hyɛ wo nsa; wone ayisaa boafo. ^b Bubu ɔbɔnefo ne onipa bɔne no abasa; bisa nʼamumɔyɛ ho asɛm kosi sɛ worenhu bi bio.

Yɛn Agya ne ɔhene daa daa; amanaman no yera fi nʼasase so. Wote wɔn a wɔrehu amane no akɔnnɔ, yɛn Agya; wobɛhyɛ wɔn akoma den; wobɛyɛ aso atie yiye, sɛ wobɛdi ayisaa ne wɔn a wɔhyɛ wɔn so no asɛm atɛntrenee mu, sɛnea ɛbɛyɛ a nnipa a wofi asase mu no renhunahuna obiara bio.