Muri Kupi?

Kunyunyuta pachena kuti Baba vedu vanoita sevamire kure apo varume vanozvikudza vachivandira varombo, vachizviudza kuti hapana ari kuona. Munyori wepisarema anosimbirira kuti ivo vanozviona, uye anovakumbira kuti vaite somubatsiri wenherera.

Chitsauko 10.

Sei, Baba vedu, mumire kure? Sei muchizvivanza munguva dzokutambudzika?

Mukuzvikudza kwake munhu akaipa anotandanisa murombo nehasha; vakaipa ngavabatwe mumano avakaronga. Nokuti akaipa anozvirumbidza pamusoro pezvinoshuviwa nomwoyo wake; munhu ane makaro anotuka achiramba Baba vedu. Mukuzvikudza kwake munhu akaipa haangatsvaki Baba vedu; pfungwa dzake dzose ndedzokuti, “Hakuna Mwari.” ^a Nzira dzake dzinobudirira nguva dzose; kutonga kwenyu kuri kumusoro, kure pamusoro pake; anoseka vavengi vake vose. Anoti mumwoyo make, “Handingatongozununguswi; kubva kuchizvarwa kusvika kuchizvarwa handingawani dambudziko.”

Muromo wake uzere nokutuka nokunyengera nokumanikidza; pasi porurimi rwake pane dambudziko nouipi. Anogara akavandira pedyo nemisha; ari munzvimbo dzokuvanda anouraya vasina mhosva, meso ake achinyangira vasina simba. Anovandira muchivande seshumba iri mudenhere rayo; anovandira kuti abate murombo, achikwevera murombo mumumbure wake. Vanenge vakabatwa naye vanopwanyika, vanowira pasi; vasina simba vanowira nesimba rake. Anoti mumwoyo make, “Mwari akakanganwa; akavanza chiso chake; haazomboona.”

Simukai, Baba vedu! Simudzai ruoko rwenyu; musakanganwa vanotambudzika. Sei munhu akaipa achiramba Baba vedu achiti mumwoyo make, “Hamungandibvunzi mhosva”? Asi imi munoona, nokuti munocherechedza dambudziko neshungu, kuti muzviise mumaoko enyu. Asina simba anozvipira kwamuri; ndimi mubatsiri wenherera. ^b Vhunai ruoko rwomunhu akaipa nowakashata; bvunzai uipi hwake kusvikira musingachahuwani.

Baba vedu ndivo mambo nokusingaperi-peri; ndudzi dzinoparara panyika yavo. Munonzwa kushuva kwavanotambudzika, Baba vedu; muchasimbisa mwoyo yavo; mucharereka nzeve yenyu, kuti mururamisire nherera navanomanikidzwa, kuti vanhu zvavo vasazotyisa zvakare.