Chopchiin Pororyosyek Agobo Inyee
Tyeni. Saaminetap Asap.
Kagotuiyo togeet — Edom, Moab, Ammon, Assyria ak alak — si kobet kainetap Israel komugul. Guuri Asap icheek age tugul kainennyi, soomei koterterin icheek ko uu ye ki iterter Midian, ak yeityo kosoom kaliilet ne imut icheek kocheeng' kainetap Kwandanyo.
83 1Ee Kwandanyo, amesiis; amenyaliil anan itebee siot, ee Kwandanyo. 2Amu ogeer, poldos puuniguk; kagitogosta metowekwak che wechei inyee. 3Agobo piiguk chopchiin kabwaatutik eng' ung'oot; chopchiin togeet agobo che konorweng'ung'. 4Kole, “Oponu, kewong'u icheek si koma koek pororyet; si ma kobwaatin kainetap Israel kogeny.” 5Eng' muguleldo ne agenge, chopchiin togeet; yaei arorutyet agobo inyee, 6emaisyegap Edom ak Ismaelik, Moab ak Hagarik, 7Geba ak Ammon ak Amelek, Philistia kobooto che menyei Tyro. 8Kiropchigei agine Assyria kobooto icheek; kagoek euut ne kiim ne po lagogap Lot.
9Yachi icheek ko uu ye kiyachi Midian, ko uu ye kiyachi Sisera ak Jabin eng' aineetap Kison, 10che ki wecho eng' En-dor ak kagoek chemit ne po ng'wony. 11Yai piikwak che taagunotiin koek ko uu Oreb ak Seeb, pounikwak tugul ko uu Seba ak Salmuna, 12che ki le, “Kenyaban kobunjech susweegap Kamuktaindet.” 13Ee Kwandanyo, yai icheek koek ko uu temburyek ne ilyeli, ko uu mobeek eng' taitap usoonet. 14Ko uu ye beelei maat timdo, ak ko uu liplibenetap maat ne beelei tuloonook, 15ko uu nooto isup icheek eng' usooneng'ung' ne oo, ak iyweisye icheek eng' kipchurchuryeng'ung'. 16Tuch togoochikwak eng' kaliilet, si kocheeng' kainneng'ung', ee Kwandanyo. 17Ingolilan ak kotoptobenso koigeny; ingolusyo eng' sasisyet, 18si konai ale inyee kityo, ne kainneng'ung' Kwandanyo, ko Ineendet Ne Toroor Miising' eng' ng'wony komugul.