Saamu 83

83 ¹Baba wa, má ṣe dákẹ́; má ṣe pa ẹnu rẹ mọ́, bẹ́ẹ̀ ni má ṣe dúró jẹ́ẹ́, Baba wa. ²Nítorí wò ó, àwọn ọ̀tá rẹ ń pariwo; àwọn tí ó kórìíra rẹ ti gbé orí wọn sókè. ³Sí àwọn ènìyàn rẹ ni wọ́n ń gbìmọ̀ ní ìkọ̀kọ̀; wọ́n jọ ń dìtẹ̀ sí àwọn tí o kà sí iyebíye. ⁴Wọ́n wí pé, “Ẹ wá, ẹ jẹ́ kí a pa wọ́n rẹ́ kúrò bí orílẹ̀-èdè; kí a má sì rántí orúkọ Israẹli mọ́.” ⁵Pẹ̀lú ọkàn kan ni wọ́n ń dìtẹ̀; wọ́n dá májẹ̀mú sí ọ, ⁶àwọn àgọ́ Edomu àti àwọn ọmọ Iṣmaeli, Moabu àti àwọn ọmọ Hagari, ⁷Gebali àti Ammoni àti Amaleki, Filistia pẹ̀lú àwọn olùgbé Tire. ⁸Asiria pẹ̀lú ti darapọ̀ mọ́ wọn; wọ́n ti di apá alágbára fún àwọn ọmọ Lotu.

⁹Ṣe sí wọn gẹ́gẹ́ bí o ti ṣe sí Midiani, gẹ́gẹ́ bí o ti ṣe sí Sisera àti Jabini ní odò Kiṣoni, ¹⁰àwọn tí a parun ní Eni-dori, tí wọ́n sì di ìgbẹ́ fún ilẹ̀. ¹¹Sọ àwọn ọlọ́lá wọn dàbí Orebu àti Seebu, gbogbo àwọn ọmọ-ọba wọn dàbí Seba àti Salmunna, ¹²àwọn tí ó wí pé, “Ẹ jẹ́ kí a gba fún ara wa àwọn ibùjẹ ẹran ti Ọlọ́run.” ¹³Baba mi, sọ wọ́n dàbí eruku tí ń yípo, dàbí ìyàngbò níwájú afẹ́fẹ́. ¹⁴Gẹ́gẹ́ bí iná ti ń jó igbó run, gẹ́gẹ́ bí ọwọ́ iná ti ń dáná sun àwọn òkè, ¹⁵bẹ́ẹ̀ ni kí o fi ìjì rẹ lépa wọn, kí o sì fi ẹ̀fúùfù líle rẹ dẹ́rù bà wọ́n. ¹⁶Fi ìtìjú bo ojú wọn, kí wọ́n lè wá orúkọ rẹ, Baba wa. ¹⁷Kí ojú kí ó tì wọ́n, kí wọ́n sì rẹ̀wẹ̀sì títí láé; kí wọ́n ṣègbé nínú àbùkù, ¹⁸kí wọ́n lè mọ̀ pé ìwọ nìkan ṣoṣo, ẹni tí orúkọ rẹ̀ ń jẹ́ Baba wa, ni Ọ̀gá-ògo jùlọ lórí gbogbo ayé.