Zaburi 83

83 ¹Ee Baba yetu, usinyamaze; usikae kimya wala usitulie, Ee Baba yetu. ²Maana tazama, adui zako wanafanya ghasia; wanaokuchukia wameinua vichwa vyao. ³Juu ya watu wako wanafanya hila kwa siri; wanashauriana pamoja juu ya wale unaowathamini. ⁴Wanasema, "Njooni, tuwafutilie mbali wasiwe taifa; jina la Israeli lisikumbukwe tena." ⁵Kwa nia moja wamefanya shauri; wamefanya agano dhidi yako, ⁶mahema ya Edomu na Waishmaeli, Moabu na Wahagri, ⁷Gebali na Amoni na Amaleki, Ufilisti pamoja na wakaao Tiro. ⁸Ashuru naye ameungana nao; wamekuwa mkono wa nguvu wa wana wa Lutu.

⁹Uwatendee kama ulivyowatendea Midiani, kama Sisera na Yabini katika mto Kishoni, ¹⁰walioangamizwa huko En-dori wakawa samadi kwa ardhi. ¹¹Uwafanye wakuu wao kama Orebu na Zeebu, wana wa mfalme wao wote kama Zeba na Salmuna, ¹²waliosema, "Na tujitwalie malisho ya Mungu." ¹³Ee Baba yangu, uwafanye kama mavumbi yazungukayo, kama makapi mbele ya upepo. ¹⁴Kama vile moto uteketezavyo msitu, kama mwali wa moto uwashavyo milima, ¹⁵vivyo hivyo uwafuatie kwa tufani yako na kuwatia hofu kwa dhoruba yako. ¹⁶Uzifunike nyuso zao kwa aibu, ili walitafute jina lako, Ee Baba yetu. ¹⁷Na waaibike na kufadhaika milele; na waangamie kwa fedheha, ¹⁸ili wajue ya kuwa wewe peke yako, ambaye jina lako ni Baba yetu, ndiwe Uliye Juu Sana juu ya nchi yote.