قومونه ستا خلاف سازش کوى
يوه سندره. د آساف زبور.
يو ائتلاف — ادوم، موآب، عمون، آشور او نور — موافقه کړې چې د اسرائيل نوم بېخي محوه کړي. آسف هر يو په نوم يادوي، هغه ماتې غواړي چې پر مديان راغله، او بيا داسې شرم غواړي چې هغوی دې ته اړ کړي چې زموږ د پلار نوم ولټوي.
83 1اے زمونږ پلاره، چوپ مۀ شه؛ خاموش مۀ اوسه او ارام مۀ شه، اے زمونږ پلاره. 2ځکه ګوره، ستا دښمنان شور ماشور کوى؛ ستا نفرت کوونکو خپل سرونه پورته کړى دى. 3ستا د خلقو خلاف هغوئ په پټه سازش کوى؛ ستا د ګرانو خلاف هغوئ يو ځائ سر جوړوى. 4هغوئ وائى چې، ”راشئ، چې دا قوم له منځه يوسو؛ ترڅو د اِسرائيل نوم نور يادول نۀ شى.“ 5هغوئ په يوه خيال سازش کوى؛ ستا خلاف هغوئ لوظ کوى، 6د ادوم خيمې او اِسماعيليان، موآب او هاجريان، 7جبال او عمون او عماليق، فلستيه د صور د اوسېدونکو سره. 8اسوريه هم د هغوئ سره يو ځائ شوه؛ هغوئ د لوط د اولاد مضبوط لاس جوړ شوى دى.
9له هغوئ سره هغه شان وکړه لکه چې له مديان سره دې کړى وُو، لکه له سيسرا او يابين سره د قيسون په سيند کښې، 10کوم چې په عين دور کښې هلاک شول او د زمکې دپاره سرے جوړ شول. 11د هغوئ معزز خلق لکه عوريب او زيب جوړ کړه، د هغوئ ټول سردران لکه زبح او ضلمنع، 12چا چې ووئيل چې، ”راځئ چې د ځان دپاره د خُدائ پاک څرګاهونه ونيسو.“ 13اے زما پلاره، هغوئ لکه څرخېدونکې دوړې جوړ کړه، لکه د باد په مخکښې بوس. 14لکه څنګه چې اور يو ځنګل سوزوى، لکه څنګه چې لمبه غرونه بلوى، 15هم هغه شان هغوئ په خپل طوفان سره وځغلوه او په خپله آندهۍ سره هغوئ وېره کړه. 16د هغوئ مخونه په شرم سره پټ کړه، ترڅو هغوئ ستا نوم ولټوى، اے زمونږ پلاره. 17هغوئ دې د تل دپاره شرمنده او پرېشانه شى؛ هغوئ دې په رُسوايۍ سره هلاک شى، 18ترڅو هغوئ پوهه شى چې يواځې تۀ، چې نوم دې زمونږ پلار دے، د ټولې زمکې باندې تر ټولو اوچت يې.
