Mga Awit 83

83 ¹O ating Ama, huwag kang manahimik; huwag kang magwalang-kibo o tumigil, O ating Ama. ²Sapagkat tingnan mo, ang iyong mga kaaway ay nagkakagulo; ang mga napopoot sa iyo ay nagtaas ng kanilang mga ulo. ³Laban sa iyong bayan sila ay lihim na nagbabalak; nagsasabwatan silang sama-sama laban sa mga itinatangi mo. ⁴Sinasabi nila, “Halina, lipulin natin sila bilang isang bansa; huwag nang maalala pa ang pangalan ng Israel.” ⁵Nang may iisang isip sila ay nagsasabwatan; laban sa iyo sila ay gumagawa ng isang tipan, ⁶ang mga tolda ng Edom at ang mga Ismaelita, ang Moab at ang mga Hagrita, ⁷ang Gebal at ang Ammon at ang Amalek, ang Filistia kasama ang mga naninirahan sa Tiro. ⁸Ang Asiria man ay sumanib sa kanila; sila ay naging malakas na bisig ng mga anak ni Lot.

⁹Gawin mo sa kanila ang gaya ng ginawa mo sa Midian, gaya kina Sisera at Jabin sa ilog Kison, ¹⁰na nalipol sa En-dor at naging pataba ng lupa. ¹¹Gawin mong tulad nina Oreb at Zeeb ang kanilang mga maharlika, at tulad nina Zeba at Zalmuna ang lahat ng kanilang mga prinsipe, ¹²na nagsabi, “Ariin natin para sa ating sarili ang mga pastulan ng Diyos.” ¹³O aking Ama, gawin mo silang tulad ng ipuipong alikabok, tulad ng ipa sa harap ng hangin. ¹⁴Kung paanong tinutupok ng apoy ang isang kagubatan, kung paanong sinisilaban ng liyab ang mga bundok, ¹⁵gayon mo silang habulin sa pamamagitan ng iyong bagyo at sindakin sila sa pamamagitan ng iyong unos. ¹⁶Takpan mo ng kahihiyan ang kanilang mga mukha, upang hanapin nila ang iyong pangalan, O ating Ama. ¹⁷Sila nawa'y mapahiya at masindak magpakailanman; sila nawa'y malipol sa kahihiyan, ¹⁸upang kanilang malaman na ikaw lamang, na ang pangalan ay ating Ama, ang Kataas-taasan sa buong lupa.