Nasyon yo fè konplo kont ou

Yon chante. Yon sòm Asaf.

Yon koalisyon — Edon, Moab, Amon, Asiri ak lòt ankò — dakò pou efase non Izrayèl nèt. Asaf nonmen chak, mande pou yo bat yo menm jan ak Madyan, epi li mande yon wont ki ta pouse yo chèche non Papa nou.

Chapit 83.

O Papa nou, pa rete san ou pa pale; pa rete an silans, pa rete trankil, O Papa nou. Paske gade, lènmi ou yo ap fè dezòd; moun ki rayi ou yo leve tèt yo. Kont pèp ou a y'ap fè konplo an kachèt; yo mete tèt yo ansanm kont moun ou renmen anpil yo. Yo di: “Vini non, ann efase yo nèt pou yo pa yon nasyon ankò; pou pesonn pa janm chonje non Izrayèl ankò.” Yo tout dakò nan yon sèl lide y'ap fè konplo; yo pase yon kontra kont ou, tant moun Edòm yo ak moun Izmayèl yo, moun Moab yo ak moun Aga yo, moun Gebal, moun Amon ak moun Amalèk, peyi Filisti ansanm ak moun lavil Tir yo. Peyi Lasiri tou vin mete tèt ansanm ak yo; yo tounen fòs ponyèt pitit Lòt yo.

Fè yo sa ou te fè moun Madyan yo, sa ou te fè Sisera ak Jaben bò larivyè Kichon an, yo menm ki te detwi nan Endò, yo tounen fimye pou tè a. Fè gwo chèf yo tounen tankou Orèb ak Zeyèb, fè tout prens yo tounen tankou Zebak ak Salmouna, yo menm ki te di: “Ann pran pou tèt nou patiraj Bondye yo.” O Papa mwen, fè yo tounen tankou pousyè k'ap vire nan van, tankou pay devan van an. Menm jan dife boule yon rakbwa, menm jan flanm dife mete dife nan mòn yo, se konsa pou ou kouri dèyè yo ak gwo van tanpèt ou a, pou ou fè yo tranble ak gwo loraj ou a. Kouvri figi yo ak wont, pou yo ka chèche non ou, O Papa nou. Se pou yo wont, se pou yo dekouraje pou tout tan; se pou yo peri nan dezonè, pou yo ka konnen se ou menm sèl, ou menm ki rele Papa nou, se ou ki Pi Wo a sou tout latè a.