Madzindza Asapangana Toera Kupokana na Imwe
Nyimbo. Salmo ya Asafe.
Madzindza — Edomu, Moabe, Amoni, Asiriya na winango — apangana kufudziratu dzina ya Izarayeli. Asafi asaadoma ubodzi na ubodzi, mbaphemba kuti athawiswe ninga Midiyani, buluka penepo mbaphemba manyadzo anafuna kuacitisa kusaka dzina ya Baba wathu.
83 1Baba wathu, lekani kukhala cete; lekani kumatama nee kupuma, Baba wathu. 2Thangwi onani, anyamalwa anu asacita phokoso; ale anakuwengani atukula misolo yawo. 3Kupokana na mbumba yanu asapangana mwacibisobiso; asabverana pabodzi toera kumenyana na ale munaakoya Imwe. 4Iwo asalonga kuti: “Bwerani, tiafudze ninga dzindza; dzina ya Izarayeli ileke kukumbukwa pontho.” 5Na ntima ubodzi asabverana; asacita cibverano toera kupokana na Imwe, 6mahema a Edomu na Aisimaeli, Moabe na Ahagari, 7Gebali na Amoni na Amaleki, Filistiya pabodzi na anyakukhala a ku Tiro. 8Asiriya aphatananambo na iwo; iwo akhala cikono cakuwanga ca ana a Loti.
9Acitireni ninga mudacita imwe kuna Midiyani, ninga kuna Sisera na Yabini pa nkulo wa Kisoni, 10ale adafudzwa pa Endori mbakhala manyowa a nthaka. 11Citani akulu awo akhale ninga Orebe na Zebe, anyampfumu awo onsene ninga Zeba na Zalimuna, 12ale adalonga kuti: “Tikwate toera ife tekha malo akudyesa a Mulungu.” 13Baba wanga, acitireni akhale ninga pfumbi inazungunuswa, ninga mungu pamaso pa mphepo. 14Ninga moto unapisa nsitu, ninga lirimi ya moto inapisa mapiri, 15tenepo aathamangiseni na conamphepo canu pontho aagopeseni na cimphepo canu. 16Phimbirani nkhope zawo na manyadzo, toera asake dzina yanu, Baba wathu. 17Mbakhale na manyadzo mbadzudzumika kwa kwenda na kwenda; mbafudzwe mwa kunyaziwa, 18toera adziwe kuti Imwe mwekha, wakuti dzina yanu ndi Baba wathu, ndimwe Wankulu Kakamwe pa dziko yonsene yapantsi.
