சங்கீதம் 83

83 ¹ எங்கள் பிதாவே, மவுனமாயிராதேயும்; பேசாமலிராதேயும், சும்மாயிராதேயும், எங்கள் பிதாவே. ² இதோ, உம்முடைய சத்துருக்கள் கொந்தளிக்கிறார்கள்; உம்மைப் பகைக்கிறவர்கள் தலைநிமிர்ந்திருக்கிறார்கள். ³ உம்முடைய ஜனத்திற்கு விரோதமாய் அவர்கள் இரகசியமாய்த் தந்திரம் பண்ணுகிறார்கள்; நீர் அருமையாய் எண்ணுகிறவர்களுக்கு விரோதமாய் ஏகமாய்ச் சதிசெய்கிறார்கள். ⁴ “வாருங்கள், இவர்களை ஒரு ஜாதியாயிராதபடி அழித்துப்போடுவோம்; இஸ்ரவேலின் பேர் இனி நினைக்கப்படாதிருக்கக்கடவது” என்கிறார்கள். ⁵ அவர்கள் ஏகமனதாய் ஆலோசனை பண்ணி, உமக்கு விரோதமாய் உடன்படிக்கை செய்திருக்கிறார்கள்— ⁶ ஏதோமியரின் கூடாரங்களும் இஸ்மவேலரும், மோவாபியரும் ஆகரியரும், ⁷ கேபாலும் அம்மோனும் அமலேக்கும், தீருவின் குடிகளோடே பெலிஸ்தியரும் சேர்ந்திருக்கிறார்கள். ⁸ அசீரியரும் அவர்களோடே சேர்ந்து, லோத்தின் புத்திரருக்குப் பலத்த புயமாயிருக்கிறார்கள். சேலா

⁹ மீதியானருக்குச் செய்ததுபோல அவர்களுக்கும் செய்யும்; கீசோன் ஆற்றண்டையில் சிசெராவுக்கும் யாபீனுக்கும் செய்ததுபோலவே; ¹⁰ அவர்கள் எந்தோரில் அழிந்து, நிலத்திற்கு எருவானார்கள். ¹¹ அவர்களுடைய பிரபுக்களை ஓரேபைப்போலவும் சேபைப்போலவும், அவர்களுடைய அதிபதிகள் யாவரையும் சேபாகைப்போலவும் சல்முனாவைப்போலவும் ஆக்கும்; ¹² “நமக்குச் சொந்தமாக்கிக்கொள்ளுவோம்” என்று சொன்னவர்கள்— தேவனுடைய மேய்ச்சல் நிலங்களையே. ¹³ என் பிதாவே, அவர்களைச் சுழல்கிற தூசியைப்போலவும், காற்றுக்கு முன்பாகப் பறக்கிற பதரைப்போலவும் ஆக்கும். ¹⁴ காடு அக்கினியால் எரிவதுபோலவும், நெருப்பு மலைகளைச் சுட்டெரிப்பதுபோலவும், ¹⁵ அப்படியே உம்முடைய பெருங்காற்றினால் அவர்களைத் துரத்தி, உம்முடைய புசலினால் அவர்களைக் கலங்கப்பண்ணும். ¹⁶ அவர்களுடைய முகங்களை வெட்கத்தால் மூடும்; அப்பொழுது அவர்கள் உம்முடைய நாமத்தைத் தேடுவார்கள், எங்கள் பிதாவே. ¹⁷ அவர்கள் என்றென்றைக்கும் வெட்கி கலங்குவார்களாக; இலச்சையடைந்து அழிந்துபோவார்களாக; ¹⁸ நீர் ஒருவரே என்றும், எங்கள் பிதா என்னும் நாமமுள்ள நீர் பூமியனைத்தின்மேலும் மகா உன்னதமானவர் என்றும் அவர்கள் அறிந்துகொள்ளும்படி.