መዝሙር 83

83 ¹አባታችን ሆይ፤ ዝም አትበል፤ ጸጥ ብለህ አትረጋጋ፤ አባታችን ሆይ። ²እነሆ፣ ጠላቶችህ ተናውጠዋልና፤ የሚጠሉህ ራሳቸውን ቀና አድርገዋል። ³በሕዝብህ ላይ በስውር ተንኰል ይሸርባሉ፤ ውድ በሆኑልህም ላይ አብረው ይማከራሉ። ⁴እንዲህ ይላሉ፦ “ኑ፣ ሕዝብ ሆነው እንዳይኖሩ እናጥፋቸው፤ የእስራኤልም ስም ከእንግዲህ አይታወስ።” ⁵በአንድ ልብ ሆነው ይማከራሉ፤ በአንተም ላይ ኪዳን ይገባሉ፤ ⁶የኤዶም ድንኳኖችና እስማኤላውያን፣ ሞአብና አጋራውያን፣ ⁷ጌባል፣ አሞንና አማሌቅ፣ ፍልስጥኤም ከጢሮስ ነዋሪዎች ጋራ። ⁸አሦርም ደግሞ ከእነርሱ ጋር ተባብሯል፤ ለሎጥ ልጆችም ብርቱ ክንድ ሆነዋል።

⁹ለምድያም እንዳደረግህ፣ በቂሶን ወንዝም ለሲሣራና ለኢያቢስ እንዳደረግህ አድርግባቸው፤ ¹⁰በዔንዶር የጠፉትን፣ ለምድርም ፍግ የሆኑትን። ¹¹መኳንንታቸውን እንደ ዖሬብና እንደ ዜብ አድርግ፤ አለቆቻቸውንም ሁሉ እንደ ዜባሕና እንደ ጸልሞና አድርግ፤ ¹²እንዲህ ያሉትን፦ “የእግዚአብሔርን መሰማሪያ ለራሳችን እንውሰድ።” ¹³አባቴ ሆይ፣ እንደሚዞር ትቢያ፣ በነፋስ ፊት እንዳለ ገለባ አድርጋቸው። ¹⁴እሳት ዱርን እንደሚያቃጥል፣ ነበልባልም ተራሮችን እንደሚያነድ፣ ¹⁵እንዲሁ በዐውሎ ነፋስህ አሳድዳቸው፤ በማዕበልህም አስደንግጣቸው። ¹⁶ፊታቸውን በኀፍረት ሸፍን፤ ስምህን ይፈልጉ ዘንድ፣ አባታችን ሆይ። ¹⁷ለዘላለም ያፍሩና ይደንግጡ፤ በውርደትም ይጥፉ፤ ¹⁸አንተ ብቻ፣ ስምህ አባታችን የሆንከው፣ በምድር ሁሉ ላይ ልዑል እንደ ሆንህ ያውቁ ዘንድ።