Laa 83

83 ¹O ithumwui Avā, kasaikha mapamihaialu; va̱rihai eina mapamihaialu, O ithumwui Avā. ²Kaja yanglu, nawui yangkashebingna khonkazār shoka; nali yangkakharingbingna athumwui kui khāngkaihaira. ³Nawui mibingli mamayāla athumna ngathumda makaphā ngarāna; nana lan thāda yaobingli mamayāla otsakruma. ⁴Athumna hānga, "Ralu, athumli yur khangasāwui eina katathaosa; Israelwui ming chi katang maleila maphaningungluimara." ⁵Ning akha eina athumna otsakruma; nali mamayāla tuingashit sai, ⁶Edomwui kachonshim kala Ishmaelnaobing, Moab kala Hagrinao, ⁷Gebal kala Ammon kala Amalek, Philistia kala Tyrewui khaleibing. ⁸Assyriala athumli zanghaira; athum Lotwui naomayarabingwui pangshap pāngthei ngasāhaira.

⁹Midianaobingli nana kasā thāda, Kishon kongli Siserali kala Jabinli sākhami thāda, athumli sālu, ¹⁰En-dorli shimānserhaira kala ngaleiwui vang hār ngasāhaira. ¹¹Athumwui khangamabingli Oreb kala Zeebwui thāda, athumwui wungnaobing saikorali Zebah kala Zalmunna thāda sālu, ¹²athumna hānga, "Varewui seizatpamli ithum khalattawui vang khuisa." ¹³O iwui Avā, athumli chifa khaningkathui thāda, masiwui mangāli lanji thāda sālu. ¹⁴Meina ngahong chuitā thāda, meiwonna kaphungbingli chuitāser thāda, ¹⁵chithāda nawui siphan zingrot eina athumli kharomlu, kala nawui sur eina athumli ngachee ngasaklu. ¹⁶Athumwui maili maikashi eina fakhamlu, chithāda athumna nawui ming phāranu, O ithumwui Avā. ¹⁷Athum katang maleila mai mashi ngasakta khakshingakhaoranu; maikashi eina shimānhaoranu, ¹⁸chieina athumna namāngna, aming ithumwui Avā hoa, okathui saikorali Juikhamataia china kaji theikhuira.