詩篇 83

83 ¹我哋嘅父啊,求你唔好緘默;我哋嘅父啊,唔好唔出聲,唔好靜默。 ²因為你睇,你嘅仇敵喧嚷起哄;恨你嘅人昂起頭嚟。 ³佢哋暗中謀害你嘅子民; 一齊圖謀對付你所珍惜嘅人。 ⁴佢哋話:「嚟啦,等我哋將佢哋滅絕,唔畀佢哋做一個民族; 等以色列嘅名再冇人記得。」 ⁵佢哋同心圖謀;一齊立約對抗你, ⁶有以東嘅帳棚同以實瑪利人, 摩押同夏甲人, ⁷迦巴勒、亞捫同亞瑪力, 非利士同埋推羅嘅居民。 ⁸亞述都加入咗 佢哋;成為羅得子孫嘅幫兇。

⁹求你對付佢哋,好似你對付米甸咁, 好似對付基順河邊嘅西西拉同耶賓咁, ¹⁰佢哋喺隱多珥被消滅, 變成地上嘅糞土。 ¹¹求你使佢哋嘅貴族好似俄立同西伊伯咁, 使佢哋所有嘅首領好似西巴同撒慕拿咁, ¹²佢哋曾經話:「等我哋攞埋 神嘅草場,歸自己所有。」 ¹³我嘅父啊,求你使佢哋好似打旋嘅塵埃,好似風前嘅糠秕。 ¹⁴好似火燒穿森林咁, 好似火焰燒着群山咁, ¹⁵求你都咁樣用你嘅暴風追趕佢哋, 用你嘅狂風驚嚇佢哋。 ¹⁶求你使佢哋滿面羞愧, 等佢哋尋求你嘅名,我哋嘅父啊。 ¹⁷願佢哋永遠蒙羞驚惶;願佢哋喺恥辱之中滅亡, ¹⁸等佢哋知道惟獨你, 你嘅名係我哋嘅父,係管治全地嘅至高者。