Phang Shuongei No Khulimbo Huon Lamda
Chia che. Asafeibü chia che.
Dangbou shuong—Edom, Moab, Ammon, Assiria hoba lubü shuong—phang che tegü longkeian, Israel nyen pendou mautila theyolanyobü kümbei. Asafei cheei che nyen sangda, Midian to loubü mautibü tegü loula ditda, hoba himou cheei haoen seneibü Bou nyen soumo hatla shanga apbuashi dogo ditda.
83 1O seneibü Bou, semele tekiti; nyi ngüh üangko tekiti ayingsi sangsembo tekiti, O seneibü Bou. 2Aishanga chühashi, kaibü dangbou shuong pühnyinda; ka to mangsenbü shuongei haoeneibü khu longtikei. 3Kaibü mütli khulimbo haoenei huphanga huon lamda; kaibü the to loubü shuong khulimbo haoenei liko huon lamda. 4Haoenei laukei, “Kaiya, senei haoen phang che tegü mautikho; khünei Israel nyen touje adamentilabü.” 5Haoenei maangpon che ongei huon lamda; no khulimbo haoenei theyolanyobü che kümbei, 6Edom neichem shuong hoba Ishmaelbü, Moab hoba Hagarbü, 7Gebal hoba Ammonbü hoba Amalekbü, Filistia, Tair kibü shuong yoa. 8Assiria kakei haoen yoa yoshaikei; haoenei Lot shousi shuongeibü sekokbü phak yeikei.
9Midianbü to kümbü tegü haoen to kümshi, Kishon shumanga Sisera si Jabin to kümbü tegü, 10haoen Endora mautikei hoba kaoeibü tapei la yeikei. 11haoeneibü yaangenbü shuong Oreb si Zeeb tegü yeitishi, haoeneibü leiyeibü shuong pendou Zeba si Zalmunna tegü yeitishi, 12haoenei laukei, “Senei sen shanga Mühghaü lamshaushang lekho.” 13O kü Bou, haoen pendou ae sepeibü thamngu tegü, yei junga sho tegü yeitishi. 14wanei yam juokko suibü tegü, wanlong shongh shuong wan longtibü tegü, 15kho tegü kaibü danjungei haoen shijung haushi hoba kaibü ngokan haoen to hatbümokbüei sühtishi. 16himouei haoeneibü thenyek küplepashi, khünei haoenei kaibü nyen lamlabü, O seneibü Bou. 17Haoen ponpen himouko hoba hatyomokyoko yingshi; haoen himoua mauashi, 18No mütpem, kaibü nyen seneibü Bou ki, no kaodak pendou thüka Thükkabou ki dogo haoenei ngelabü.
