Khaoh Angachāng Ngalei
Ngasot kahai, kaki̱khaya ram akhawui eina kayādon mibing papyrus kong eina tāngda rāa, kha ithumwui Avāna, zimik ngasālli khalei kasa thāda, ngasīkda yangpamra hānga, athei kahāwui kha̱ngā mangāda — chitākam eina aphāngbing kaphongra. Chiwui thili, chi mibingna khalatta Zion Kaphungli yangta ot khuivāra.
18 1O khaoh angachāng ngalei, Cushwui kongbing kānda, 2shamadru eina mathunbing chihovā kahaina, chihirthing khorkhongli tara̱ makānvai. Vālu, paome kathākabing, yur juilaka kala kachui khanganaili, nganailakha kala tālak ngachee khangasaka mili, kapanga kala naikazam khame yur, awui ngalei kongbingna ngayara. 3Okathuili kapam saikora nathum, ngaleili leikasā nathum: kaphungtungli philān khangkā tharan, yanglu! Talla̱ khong tharan, nganālu!
4Kaja ithumwui Avāna ili hithāda hānga: Zimikwui kahorli tharzā kasā thāda, mahā atamli ikra̱ muiyā thāda, ina kasaikha pamra, kala iwui pamkhavaiwui eina yangpamra.
5Kaja mahā masāranglakha, awon peihaira tharan kala athing chi drakhāthei khanganao ngasā tharan, ithumwui Avāna khainao eina atonbing katathaora, kala ngapānhai aphāngbing chi ana hortāda katathaora. 6Athum saikora kaphungwui khalāng sāshaabing kala ngaleiwui sāyurbingwui vang horhaora. Khalāng sāshaabingna athumtungli lumkachāng peida pamra, kala ngaleiwui sāyurbing saikora athumtungli sikachāng peida pamra. 7Chitharan mi juilaka kala kachui khanganaiwui eina, nganailakha kala tālak ngachee khangasaka miwui eina, kapanga kala naikazam khame yur, awui ngalei kongbingna ngayara, chi yurwui eina saikorawui Avāwui aming leikhavai apam Zion Kaphungli saikorawui Avāli lemmet phungvāhaora.
