Damascus Tungli Tui Akha
Damascus chi kharkhao pānghaora, kala Israelwui kasāk chi thingthei kapaopa thingwui atungli khalei oliv thei kani kathum kha̱ngāhaora. Tui chi kakāchāng eina shokthuia: mibingna ara athumwui pāngna sākahai otli malangla, athumwui Kasaka, ithumwui Avāli yanglaga lei. Ramchonbingna ngahārāng thāda ngahuiya, chithāda mana̱shi ngasāhaira.
17 1Damascuswui pongli khamarān. Yanglu, Damascus keinung maleiluimara; chi ruinganai sāhaora. 2Aroerwui keinungbing horhaira; yaobingwui vang leihaora; yaobing chili ngayāngda leira, kala khipānakha athumli sāmachitmara. 3Ephraimwui eina raipan, kala Damascuswui eina wungram shimānhaora; kala Aramwui shākkahaia Israelnaobingwui masot thāda sāhaora, da saikorawui Avāna hānga.
4Chithanghon Jacobwui masot maishi ngasāhaora, kala awui phasāwui athao thenghaora. 5Kahātana chāngkui kazipkhui thāda sāhaora, kala apāngtheina mā aton hātkhui thāda; khipānakha Rephaim tampākli mā phākhui thāda sāhaora. 6Chithālala kateokha shākhaora, oliverong khanuk kahai thāda: atonli olivethei minphok khani-kathum, athei khamatheiya aphāngbingli mati-phangā, da Israelwui Avāna hānga. a a v6 Olive lui kasābingna athei tāngasakta thingphān katāva̱ eina aphāngbing shaolaga hātkhui; kha aton peiwui olivethei kateokhamāng chi thangkachida pāng maza̱kapaida shākchinga.
7Chithanghon mibingna athumwui Kasaali ngashānra, kala athumwui mikna Israelwui Kathara, ithumwui Avā chili ngayangra. b b v7 'Israelwui Kathara' hi Isaiahna ithumwui Avāli hokahai amingna—ali kathara Vare, khikha thangkachida ali malaida khalei miyur akhali khalattana ngarum kahaina da mingzaina. 8Athumna athumwui pāng eina sākahai hanphuttungli mangashānmara, kala athumwui pāngmareng eina sākahai Asherim kala nganamkaphā hanphutbing chi mayangpaimara. 9Chithanghon athumwui kapanga keinungbing Israelnaobing rai tharan khararli kala kaphungtonli horkahai apam thāda sāhaora; kala chi ramcho sāhaora. 10Kaja nana nawui huikhamiwui Avāli malaihaira, kala nawui ngayin khavaiwui Lunghārli maphaningungmana. Chiwui vang eina, nana leishiri kahai yāmgui sāsanglala, kala yur kateiwui drakhārongwui akhar lingsanglala, 11kala nana chi lingkahai thangla chi shon haophokta, kala ngathor nawui lingsang chi awon wonhaora; chithālala kakhanang kala maraikapai kachotwui thangli māhā chi shimānhaora. 12Ah, miyur kachungkhawui khonkazār! Athumna yireiwui khangang thāda khangangra! Yurbingwui ngarungning! Athumna kapanga tara̱wui ngarungning thāda ngarungning shāra! 13Yurbingna tara̱ kachungkhawui ngarungning thāda ngarungning shāra, kha ithumwui Avāna athumli kaharra, kala kaphungli lanji masina phankathui thāda, siphan zingrotwui mangāli sur kakhaning chifa thāda, athumna katāva̱li yāmungra. 14Ngazin eina kashuirak kahai khangachee rāra! Ngathor mashokranglakha, athum shimānhaira. Hi ithumli ngaponkakhuibingwui yarna, ithumli sākazamabingwui kashina.
