ଶବ୍ଦକାରୀ ପକ୍ଷବିଶିଷ୍ଟ ଦେଶ
ଏକ ଦୂରବର୍ତ୍ତୀ, ଭୟଙ୍କର ଜାତିରୁ ଦୂତମାନେ ନଳ-ନୌକାରେ ଦୌଡ଼ି ଆସନ୍ତି, କିନ୍ତୁ ଆମ ପିତା କହନ୍ତି ଯେ ସେ କେବଳ ସ୍ଥିର ରହି ଦେଖିବେ, ସୂର୍ଯ୍ୟାଲୋକରେ ଉତ୍ତାପ ପରି, ଅମଳର ଠିକ୍ ପୂର୍ବ ମୁହୂର୍ତ୍ତ ପର୍ଯ୍ୟନ୍ତ — ତାʼପରେ ଡାଳଗୁଡ଼ିକ କାଟି ପକାଇବେ। ପରେ ସେହି ଜାତି ନିଜେ ସିୟୋନ ପର୍ବତକୁ ଉପହାର ବହି ଆଣେ।
18 1ହାୟ, କୂଶ୍ର ନଦୀସମୂହର ସେପାରିସ୍ଥିତ ଶବ୍ଦକାରୀ ପକ୍ଷବିଶିଷ୍ଟ ଦେଶ, 2ଯେ ସମୁଦ୍ର ପଥରେ, ଜଳ ଉପର ଦେଇ ନଳଖଗଡ଼ା ନୌକାରେ ଦୂତମାନଙ୍କୁ ପ୍ରେରଣ କରେ। ହେ ଦ୍ରୁତଗାମୀ ଦୂତମାନେ, ଦୀର୍ଘକାୟ ଓ ମସୃଣଚର୍ମ ଏକ ଜାତି ନିକଟକୁ, ଦୂରରେ ଓ ନିକଟରେ ଭୟଙ୍କର ଲୋକଙ୍କ ନିକଟକୁ, ଯେଉଁ ବଳବାନ ଓ ଦଳନକାରୀ ଜାତିର ଦେଶକୁ ନଦୀସମୂହ ବିଭକ୍ତ କରନ୍ତି, ସେମାନଙ୍କ ନିକଟକୁ ଯାଅ। 3ହେ ଜଗତନିବାସୀ ସମସ୍ତେ, ହେ ପୃଥିବୀବାସୀ ଲୋକ ସମସ୍ତେ, ଯେତେବେଳେ ପର୍ବତଗଣ ଉପରେ ଧ୍ଵଜା ଉଠାଯାଏ, ସେତେବେଳେ ଦୃଷ୍ଟି କର! ଯେତେବେଳେ ତୂରୀ ବାଜେ, ସେତେବେଳେ ଶୁଣ!
4କାରଣ ଆମ୍ଭମାନଙ୍କ ପିତା ମୋତେ ଏହି କଥା କହିଲେ, ଆମ୍ଭେ ସ୍ଥିର ହୋଇ ରହିବା, ପୁଣି ସୂର୍ଯ୍ୟକିରଣରେ ନିର୍ମଳ ଉତ୍ତାପ ତୁଲ୍ୟ, ଶସ୍ୟଚ୍ଛେଦନ ସମୟର ଉତ୍ତାପରେ କାକରମୟ ମେଘ ତୁଲ୍ୟ ଆମ୍ଭେ ଆପଣା ବାସସ୍ଥାନରୁ ନିରୀକ୍ଷଣ କରିବା।
5କାରଣ ଶସ୍ୟଚ୍ଛେଦନର ପୂର୍ବରୁ, ଯେତେବେଳେ ପୁଷ୍ପ ଝଡ଼ିଯାଏ ଓ କଲିକା ପରିପକ୍ୱ ଦ୍ରାକ୍ଷାଫଳ ହୁଏ, ସେତେବେଳେ ଆମ୍ଭମାନଙ୍କ ପିତା କର୍ତ୍ତନ ଅସ୍ତ୍ର ଦ୍ଵାରା ପଲ୍ଲବସବୁ କାଟି ପକାଇବେ, ପୁଣି ବିସ୍ତୃତ ଶାଖାସବୁ ସେ ଅପସାରଣ କରି ଛେଦନ କରିବେ। 6ସେହି ସମସ୍ତ ପର୍ବତସ୍ଥ ଶିକାରୀ ପକ୍ଷୀଗଣ ନିମନ୍ତେ ଓ ପୃଥିବୀସ୍ଥ ପଶୁଗଣ ନିମନ୍ତେ ପରିତ୍ୟକ୍ତ ହେବ। ସେହି ଶିକାରୀ ପକ୍ଷୀଗଣ ସେଥିରେ ଗ୍ରୀଷ୍ମକାଳ କ୍ଷେପଣ କରିବେ, ପୁଣି ପୃଥିବୀସ୍ଥ ପଶୁ ସମସ୍ତେ ସେଥିରେ ଶୀତକାଳ କ୍ଷେପଣ କରିବେ। 7ସେହି ସମୟରେ ଦୀର୍ଘକାୟ ଓ ମସୃଣଚର୍ମ ଏକ ଲୋକଙ୍କଠାରୁ, ଦୂରରେ ଓ ନିକଟରେ ଭୟଙ୍କର ଏକ ଲୋକଙ୍କଠାରୁ, ଯେଉଁ ବଳବାନ ଓ ଦଳନକାରୀ ଜାତିର ଦେଶକୁ ନଦୀସମୂହ ବିଭକ୍ତ କରନ୍ତି, ସେମାନଙ୍କଠାରୁ ବାହିନୀଗଣର ପିତାଙ୍କ ନିକଟକୁ—ବାହିନୀଗଣର ପିତାଙ୍କ ନାମର ସ୍ଥାନ ସିୟୋନ ପର୍ବତ ନିକଟକୁ ଉପହାର ଅଣାଯିବ।
