ኢሳይያስ 18

18 ¹ወዮ፣ ከኵሽ ወንዞች ባሻገር ያለሽ፣ ክንፎች የሚንሿሿባት ምድር ሆይ፤ ²በባሕር ላይ መልእክተኞችን የምትልክ፣ በውሃው ላይ በደንገል ጀልባዎች የምትሰድድ ሆይ፤ ፈጣን መልእክተኞች ሆይ፣ ረዥምና ለስላሳ ቈዳ ወዳለው ሕዝብ፣ በቅርብና በሩቅ ወደሚፈራ ሕዝብ፣ ወደ ኀያልና ወደሚረግጥ ሕዝብ፣ ወንዞች ምድሩን ወደሚከፍሉት ሂዱ። ³እናንተ የዓለም ነዋሪዎች ሁሉ፣ በምድር ላይ የምትኖሩ ሆይ፤ በተራሮች ላይ ሰንደቅ ዓላማ ሲነሣ ተመልከቱ! መለከት ሲነፋ አድምጡ!

⁴አባታችን ለእኔ የተናገረኝ ይህ ነውና፦ ጸጥ ብዬ ከመኖሪያዬ እመለከታለሁ፤ በፀሓይ ብርሃን እንዳለ ጥሩ ሙቀት፣ በመከር ሙቀትም እንዳለ የጤዛ ደመና።

⁵ከመከር በፊት፣ አበባው ባለቀ ጊዜ፣ ቡቃያውም የበሰለ ወይን በሆነ ጊዜ፣ አባታችን ቀንበጦቹን በመግረጃ ማጭድ ይቈርጣል፤ የተዘረጉትንም ቅርንጫፎች አስወግዶ ይጨፈጭፋል። ⁶ሁሉም ለተራራ አዳኝ ወፎችና ለምድር አራዊት ይተዋሉ። አዳኝ ወፎች በእነርሱ ላይ በጋውን ያሳልፋሉ፤ የምድር አራዊትም ሁሉ በእነርሱ ላይ ክረምቱን ያሳልፋሉ። ⁷በዚያን ጊዜ ለሰማይ ሠራዊት አባት ስጦታዎች ይቀርባሉ፤ ረዥምና ለስላሳ ቈዳ ካለው ሕዝብ፣ በቅርብና በሩቅ ከሚፈራ ሕዝብ፣ ከኀያልና ከሚረግጥ ሕዝብ፣ ወንዞች ምድሩን ከሚከፍሉት—የሰማይ ሠራዊት አባት ስም ወዳለበት ስፍራ፣ ወደ ጽዮን ተራራ።