ምድሪ ድምፂ ኣኽናፍ
ልኡኻት ካብ ርሑቕን ዝፍራህን ህዝቢ ብመራኽብ ሻምብቆ ይጐይዩ፥ ኣቦና ግና ህድእ ኢሉ ኸም ፅሩይ ሃሩር ኣብ ብርሃን ፀሓይ ክጥምት ከም ዝኾነ ይብል፥ ክሳዕ እታ ቅድሚ ዓፂድ ዘላ ጊዜ — ሽዑ ድማ ነቲ ጨናፍር ይቖርፆ። ድሕሪኡ እቲ ህዝቢ ባዕሉ መባእ ናብ እምባ ፅዮን የምፅእ።
18 1ኦ ምድሪ ድምፂ ኣኽናፍ፥ ኣብ ማዕዶ ሩባታት ኵሽ ዘለኺ፥ 2ብባሕሪ ልኡኻት እትሰድድ፥ ኣብ ልዕሊ ማያት ድማ ብመራኽብ ሻምብቆ እትሰድድ። ኣቱም ቅልጡፋት ልኡኻት፥ ናብ ነዊሕ ዝቑመቱ ልሙፅ ቘርበትውን ዘለዎ ህዝቢ፥ ናብቲ ካብ ቀረባ ክሳዕ ርሑቕ ዝፍራህ ህዝቢ፥ ናብ ሓያልን ዝረግፅን፥ ሩባታት ንምድሩ ዝመቕልዎ ህዝቢ ኪዱ። 3ኣቱም ኵሉኹም ኣብ ዓለም እትነብሩ፥ ኣቱም ኣብ ምድሪ እትቕመጡ፦ ኣብ እምባታት ሰንደቕ ምስ ተተኽለ፥ ርኣዩ! መለኸት ምስ ተነፍሐ ኸዓ፥ ስምዑ!
4ኣቦና ከምዙይ ኢሉ ተዛሪቡኒ እዩ እሞ፦ ህድእ ክብል፥ ካብ ማሕደረይ ድማ ክጥምት እየ፥ ከም ፅሩይ ሃሩር ኣብ ብርሃን ፀሓይ፥ ከም ደመና ኣውሊ ኸዓ ኣብ ሃሩር ዓፂድ።
5ቅድሚ ዓፂድ፥ ዕምበባ ምስ ተወድአ እቲ ዝመዓጐ ዕምበባ ድማ ዝበስል ዘሎ ወይኒ ምስ ኮነ፥ ኣቦና ነቲ ጨንፈር ብፅንፅልሒት ክቖርፆ እዩ፥ ነቲ ዝሰፍሕ ጨናፍር ድማ ኣልጊሱ ክድርብዮ እዩ። 6ኵሎም ነተን ናይ እምባታት ኣሞራታትን ነቶም ኣራዊት ምድርን ተሓዲጎም ክተርፉ እዮም። እተን ኣሞራታት ኣብ ልዕሊኦም ሓጋይ ክሓልፉ፥ ኵሎም ኣራዊት ምድሪ ድማ ኣብ ልዕሊኦም ክረምቲ ክሓልፉ እዮም። 7በቲ ጊዜ እቲ፥ ካብ ነዊሕ ዝቑመቱ ልሙፅ ቘርበትውን ዘለዎ ህዝቢ፥ ካብቲ ካብ ቀረባ ክሳዕ ርሑቕ ዝፍራህ ህዝቢ፥ ሓያልን ዝረግፅን ህዝቢ፥ ሩባታት ንምድሩ ዝመቕልዎ፥ ናብ ኣቦ ሰራዊት ሰማይ መባእ ክቐርብ እዩ፦ ናብ ስፍራ ስም ኣቦ ሰራዊት ሰማይ፥ ናብ እምባ ፅዮን።
