Machihochaoalu
Rāki kaji okathui hi kazingraobingli maningla mibingli mihaikahaiwui vang, kala naoshinaobingna phasā eina ashee zangkhavai, Naomayarala phasā khuikhui, kathiwui pangshap chi shimān khavai kala kathili khangacheewui vang mirin peida rao sākasābingli ningkhān ngasak khavai. Ali khalatta suikahaiwui vang, kasui samphangkhaleibingli ana ngachonmira.
2 1Chiwui vang eina ithumna kashā tuibing chi lāngda nganātitkhuimei phalungra, chi maleiluiakha ithumna chihochaohaora. 2Kaja kazingraobingna hānghaikasā tui chi nganingtitta leilaga, khayon saikora kala kahāng makhanganā saikorana mashun sāman samphanga jiakha, 3chithā kahakva huikhami chi ithumna mahengsangakha, kathada latshokrakhala? Hi huikhami chi Prohona rida hāshok kahaina, kala ali kashābingna ithumli shāptitmihaira, 4chi tharan ithumwui Avānala machut, tekhamatei, matakhak kahai masākharar ayāyā kala awui ningkachāng athishurda Manglā Katharawui lemmet sharuk sāmi eina athumla ngasoda shākhi sāhaira.
Kharāki Okathui
5Kaja ithumna ngazek kaji kharā okathui chi ithumwui Avāna kazingraobingli hamsang mangasāmana. 6Khipā akhana apam akhali shākhi sāda hānghai, "Mikumo hi khida, nana ali ningkasang, lah miwui naomayara hi khida, nana ali phaningkhami? 7Nana ali atam kateo akha eina kazingraobingli suitāmeida sākhui; tekhamatei eina khayā ngashomda ngahonmi, 8ot saikora awui pheizingli hamsang ngasaka." Ot saikora ali hamsang ngasak tharan ithumwui Avāna khikha akhala hamsang makhavai mahormana. Chithālala aruichang ithumna ot saikora Khristali yuingasak kahai chi theirangsaimana.
9Kha kazingraobingli atam kateo akha eina suitāmeida sākhui kahai Jishuli ithumna thei; kathi kachotkachāng phunghaiwui vang ara ali tekhamatei eina khayā ngashomda ngahonmihaira. Kaja ithumwui Avāwui lukhamashan eina ana mi saikorawui vang kathi khamazap khavaina.
10Ot saikora awui vang kala awui shichinlaga leisā kaji ithumwui Avāna, naomayara kachungkha tekhamateili khuiung tharan, athumwui huikhamiwui khareia chi kachotkachāng eina kāshung ngasakmi hi phāmei kahaina. 11Mi tharkhangasaka kala tharkhangasak kahaibing saikora Avā akhawui eina kharāna. Chiwui vang eina ana athumli "chinaongarā" da hokhavai makhayakmana, a a v11 Jishuna tharkhangasakbingna awui Avā chi ngarumsai—athum ana katang mavaila khaning kaji shimkhur akhamānli latmi ngasakhaira. Ana athumli awui chinaongarā da hokhavai makhayakmana.
12hānga, "Ina ichināngarāli nawui ming hāngchitheira; yaruiwui ngachaili nawui masotlaa sāra."
13Kala latluida, "Ina ali shitsangra." Kala latluida, "Yanglu, I hi laka, kala ithumwui Avāna ili mihai naongarābingla hili lei." b b v13 Jishuna tui hibing hi Isaiahwui phong tuiwui eina hānga, ithumwui Avāna ali sinkhui kahai naongarābingla ngasoda khalatta chi chitheimi—shimkhur akhamānga, Avā akhamānga.
14Naongarābingna asā kala ashee ngarumhaiwui vang, anala athumla tākam eina ngarumsak, chieina kathi eina kathiwui pangshap zangkasā chipee chi sāshimān khavai, 15kala kathili khangacheewui vang athumwui mirin katonga rao sākahaibing saikorali ningkhān ngasak khavaina. 16Kaja mashunphutta ana kazingraobingli ngachona maningmana, kha Abrahamwui ara̱-azāli ngachona. 17Chiwui vang eina mibingwui morei pheomi khavai, ithumwui Avāwui otram ngatha̱da lukhamashan kala chisin kahai pāngmon kharei akha ngasā khavai, ana khangava saikorali achināngarā thāda ngasā kajina. 18Akhalattana kasui tharan kachotkachāng samphang kahaiwui vang eina, ana kasuibingli ngachonmishapa.
