لرې مۀ ځئ

څرنګه چې راتلونکې نړۍ پرښتو ته نه بلکې انسانانو ته سپارل شوې، او څرنګه چې ماشومان په غوښه او وینه کې شریک دي، زوی هم غوښه واخیسته، ترڅو د مرګ ځواک مات کړي او هغه خلک آزاد کړي چې ټول عمر د مرګ له وېرې په بند کې وو. هغه پخپله ازمول شوی، له ازمول شویو سره مرسته کوي.

څپرکی 2.

نو مونږ له پکار دى چې هغه خبرو ته ښۀ زيات غور وکړو چې اورېدلې مو دى، هسې نه چې لرې لاړ شو. ځکه کۀ هغه کلام چې د فرښتو په وسيله وئيلے شوے وو کلک ثابت شو، او هر ناسم کار او نافرمانۍ خپله مناسبه سزا وموندله، نو مونږ به څنګه بچ شو کۀ د دومره لوئ خلاصون نه بې پروا شو؟ دا اول مالِک اعلان کړو، او بيا هغه چا مونږ ته پاخه کړو چې هغه يې اورېدلے وو، او زمونږ پلار هم د نښانو، معجزو، د رنګ رنګ قدرت نمائيو او د روحُ القُدس د ورکولو په وسيله د هغوئ سره ګواهى ورکوله، د خپلې رضا مطابق.

راتلونکې دُنيا

ځکه چې زمونږ پلار هغه راتلونکې دُنيا چې د هغې خبره کوو فرښتو ته تابع نۀ کړه. بلکې چا په يو ځائ کښې ګواهى ورکړې ده، ”اِنسان څۀ شے دے چې تۀ يې ياد ساتې، او اِبن آدم څۀ دے چې تۀ د هغۀ خيال ساتې؟ تا هغه د لږ وخت دپاره د فرښتو نه کم جوړ کړو، او د لوئۍ او عزت تاج دې پرې کېښودو، او هر څۀ دې د هغۀ د پښو لاندې تابع کړل.“ نو اوس چې هر څۀ هغۀ ته تابع کړل، زمونږ پلار هيڅ شے د هغۀ د اختيار نه بهر پرېنښودو. خو تر اوسه مونږ دا نۀ وينو چې هر څۀ مسيح ته تابع شوى دى.

خو مونږ عيسىٰ وينو، چې د لږ وخت دپاره د فرښتو نه کم جوړ کړے شوے وو، او اوس د لوئۍ او عزت تاج پرې کېښودے شوے دے، ځکه چې هغۀ د مرګ تکليف وزغملو، دې دپاره چې د زمونږ پلار د فضل په سبب د هر چا دپاره مرګ وڅکى.

دا مناسبه وه چې زمونږ پلار، چې د هغۀ دپاره او د هغۀ په وسيله هر څۀ شته، د هغوئ د خلاصون مشر د تکليف په وسيله کامل کړى، او ډېر زامن لوئۍ ته ورسوى. هغه چې پاکوى او هغه څوک چې پاکولے شى، دا ټول د يو پلار نه دى. ځکه نو هغه د دې نه نۀ شرمېږى چې هغوئ وروڼه او خوندې وبولى، ^a

او وائى، ”زۀ به ستا نوم خپلو وروڼو او خوندو ته ښکاره کړم، او د جماعت په مينځ کښې به ستا ثناء وايم.“

او بيا، ”زۀ به په هغۀ بروسه وکړم.“ او بيا، ”وګوره، زۀ يم، او هغه بچى چې زمونږ پلار ماته راکړل.“ ^b

نو ځکه چې بچى په غوښه او وينه کښې شريک دى، هغه هم په دې کښې شريک شو، دې دپاره چې د مرګ په وسيله هغه څوک تباه کړى چې د مرګ قدرت يې په لاس کښې دے — يعنې اِبليس، او هغه ټول خلاص کړى چې د مرګ د وېرې نه يې ټول عُمر د غلامۍ په حالت کښې تېر کړو. ځکه چې يقيناً هغه د فرښتو مدد نۀ کوى، بلکې د اِبراهيم د اولاد مدد کوى. نو ځکه هغۀ له پکار وو چې په هر لحاظ د خپلو وروڼو او خوندو په شان شى، دې دپاره چې د زمونږ پلار په خدمت کښې يو رحم کوونکے او وفادار لوئ اِمام شى، او د خلقو ګناهونه لرې کړى. ځکه چې هغه پخپله د آزمېښت په وخت کښې تکليف وزغملو، نو هغه د هغه چا مدد کولے شى چې په آزمېښت کښې اخته وى.