Job na Katake
Job na bani ding choinu danga katakluga, ‘Ningtingnu ga nani le diga thilune,’ diga rinne; atiga rammwan khatle basaa bingna le ani Pa om kutna heiya to rwe dinu theiye diga rinne. Baom laa ga lung bazaang to make: Rikrwang na chong pinu rwan, chong kasem mi rwan, takolu rwan khatle krwang nun ding penluga, talei ram om kai thangnu rwan ding zingnu bi lampui kamaannu danga ngaak thang nge.
12 1Haba nung bi Job na katake, 2“Batak sekka nani ga mi nunne, khatle ningtingnu ga nani le diga thilune. 3Atiyeda ei le nani le bachamga baning amme; ei nani ma sinnu make. Tu na heiba danga thing thei makpo? 4Ei abaan rwan lang kiam senu pi ta thang rwe—ei, Rikrwang ding kouluga Maanna akhou katak thangnu; ririak senu khatle koi maaknu mi, atunbe kiam senu pi ta thang rwe. 5Dai bazaangnu bi ongnu mi nunna riangre ding balaa damme— baket kanuknu nun lang daan thang ongnu rou gaye. 6Inbruk mi om pwan in nun ga dai bazaang ongme, khatle Rikrwang ding balung pwan lang lao ongnu nun ga ngaaksian ongme— bani raanto kut pina bani rikrwang phun ongnu nun gaye. a a v6 Bani raanto kut pina bani rikrwang phun ongnu nun: heiya Rikrwang khou ma bani raanto kanatnu bi batakka balumsanu mi nun ding rinne. 7Atiyeda khouring bing khou ngaiyo, atiga banina nani ding chui thanglune; saangbaan la zwangnu basaa bing khou le ngaiyo, atiga banina nani ding rinlune; 8Mak tabe talei ram khou chong kabiawo, atiga hagana nani ding chui thanglune; khatle tuipui om ngaa bingna haba ga nani khou rin chui thanglune. 9Hei bing nun lak pi ani Pa om kutna heiya to rwe diga tu na thei makpo? b b v9 Baom baan rwan thum le diga sei takka inkhaangnu lak pi, heiya Job na ani Pa ding Bameng bina kounu riak khatcha gaye—baom baan rwanna kale ka hakna kou maklanu innaisunu meng gaye. Baom sung ga, maitwangnu lak pi le, kama maanna theinu Pa khou taraan ongme. 10Bakut pi ringnu thing bing nga om ringnu khatle misa nun nga om ringnu kaphuk amme. 11Balei na sa innu ga chamnu danga, kanaana chong ding tamphaang makpo? 12Ningtingnu ga mi lui bing lak pi douwe, khatle theinu ga lumik leng amnu bi amme. 13Baom bi ningtingnu khatle kanatnu amme; daannu chong khatle theinu ga Baom gaye. 14Maanna to tanaatnu ga sem thou lat lang ngam make; Maanna khaan damnu maan ga bathan lang ngam make. 15Maanna tui ding tip damme dabe, tui ga thit thou rwe; Maanna hei ding bathan swake dabe, haga talei ram ding daan rwe. 16Baom bi kanatnu khatle bataknu ningtingnu amme; minam senu mi khatle minamnu mi, bani ni khak Baom gaye. 17Maanna chong daan thangnu mi ding pwan lwak satluga kalwang thoune, khatle chongsempuba rwan ding kapangnu pi to thang nge. 18Krwang bingna to thangnu thaan pwan ding Maanna sut thang nge, khatle bani raanto badung bi loinu pwan sin thang nge. 19Maanna chongren pinu mi ding pwan lwak satluga kalwang thoune, khatle sei takka kathang swak thangnu nun ding to braan sate. 20Balumsa senu mi om mun ding Maanna khwam thang nge, khatle mi lui bing khouna kakoi baze theinu ding lou sate. 21Razapuba bing ding Maanna phaang batan thang nge, khatle kanat ongnu mi khouna bani ngam ding lou sate. 22Maanna kazingnu bina kathuknu thing bing ding indao thang nge, khatle kathuknu lim ding baan la hung lat thang nge. 23Maanna chaat bing ding lian to thangluga, hei bing ding to braan sate; Maanna chaat bing ding lian thou thangluga, bani ding kalwang thou thang nge. 24Talei ram om kai thangnu mi nun khouna Maanna bani theinu ding lou sate, khatle lampui maaknu basak riak bi bani ding serwanga damnu pi to thang nge. 25Banina baan maaknu kazingnu bi kut daanga serwan damme, khatle Maanna bani ding zu kwinu mi danga kanukdamnu pi to thang nge.”