Yungnyu ka Meisiau Che Longkei
Yungnyu ka meisiau che, pinyu yaangbü lolo setshang yoa longko, seneibü Bou to nyikukei, khei yingalonga kaodak pendouei haoeibü maitibü mou maangpangkei. Nyiboubü meisiau cheei heangsho to ngüh laula kukei, haoei to lembo akümbü shuong haitikei, hoba aoei jekla ayingsi angngaila ong lelabü kho songdakkei. Habü to mailem kho natenbü ki, satenbü aying.
13 1Dragonei yungnyu phetsena lokei. Ngei meisiau che yungnyu ka longko hapbei, khübü laang an hoba khu nyet phokei, haoeibü laang shuonga khun an, hoba haoeibü khu shuonga Mühghaü nyikubü nyen shuong kikei. 2Ngei hapbü meisiau kho leopard phatko kikei, haoeibü you kho sapeibü you phatko, haoeibü sembung kho molosaonyu sembung phatko kikei. Dragonei khübü to haoeibü hau, haoeibü setshang, hoba sei yaangbü kukei. 3Haoeibü khu yoa che kho hailabü tegü leiluan kikei, lausikei leilubü mou kho maitikei. Kaodak khümbo maangpangkei hoba meisiau phai sembei. 4Dragonei meisiau to haoeibü sei kukei shanga haoenei dragon to lembei, hoba meisiau to lembo phekei, “Meisiau phatko ao ki? Hao yoa wapyola ao thükkei?”
5Meisiau to Mühghaü khulimbo jembüei dambü hoba nyikubü ngüh laula sembung kukei, hoba lit saonyinyet kümla sei kukei. 6Haoei seneibü Bou to nyikula haoeibü sembung thonkei, haoeibü nyen hoba haoeibü kishang, khuthüka kibü shuong to nyikukei. 7Khübü to saopobü shuong khulimbo wapyola hoba haoen thükbü shanga kukei, hoba chung weko, mütshuong weko, ngühyem weko hoba phang weko thüka sei kukei. 8Kaodak ayaüen shaangla, haitia kibü Sanlon Shoushoueibü langkei le ka haoeneibü nyen dokeibü shuong to limanje, kaodaka langkei kibü pendouei khübü to lemlabü. 9Aoyou nou phoalonga, hao ditashi. 10Aoyou phangkabou to atla kialonga, hao phangkabou to atlabü; aoyou inei haitila kialonga, hao inei haitijan. Ho ka saopobü shuongeibü lamlean hoba mailem ki.
Kao ka Nyiboubü Meisiau
11Kheijinei ngei kao ka lubü meisiau che longko hapbei. Khübü to sanlon shoushou phatko laang nyi kikei, lausikei dragon phatko thekei. 12Khübü shaangbou meisiaueibü sei pendou hao shanga jungda, hoba hailabü mou maitikubü shaangbou meisiau to, kaodak hoba kaodaka kibü shuongei lemla sakkuda. 13Khübü seikümseilei yaangbü kümda, hoba mütshuong thedanga khuthük ka wan kaodak to yantila sakkuda. 14Meisiau shanga kümla sakkubü seikümseilei shuongei, inei leiluan toukei langkei kibü meisiau shanga heangsho che kümla haoen to lenko, khübüei kaodaka kibü shuong kokshoua satkuda. 15Khübü to meisiaueibü heangsho la hakhin kula sakkukei, lele heangsho ngüh the thüklabü, hoba meisiaueibü heangsho to lemla üangbü pendou haitila sakkukei.
16Khübüei pendou, hanbü hoba yaangbü, keibü hoba shalebü, ngühtet hoba sambü, haoeneibü mae ika ayingsi khüngjaa shensinge lela sakkuda, 17lele shensinge akibü ao jekla ayingsi yaakkula athüklabü: shensinge kho meisiaueibü nyen, ayingsi ho nyenbü lühbak ki. 18Ho ka songsihon haiyeida: insiaubu kibüei meisiaueibü lühbak tetan chühashi, aishanga kho müteibü lühbak ki—666. a a v18 Lühbak kho “müteibü lühbak” dogo nyenkei—kho müteibü ngüha alebü to phinthonbü shensinge che ki, tükdebü weanchühbüei loushedlabü lühbak aying.
