Charta Janwar Samundar Pora Uthi Ahise

Daniel nijor laga rati laga darshan: hila thaka samundar pora charta janwar uthi ahe, sesh laga tu lua laga daat aru ahonkar kotha kowa ekta chutu seeng thaka. Titia singhason khan rakhi dise, Purana Din laga Ekjon, amar Pitri, Tar jagah te bohe, aru manuh laga putro nisena ekjon pora kitia bhi sesh nohoa raj paye.

Adhyay 7.

Babylon laga raja Belshazzar laga prothom saal te, Daniel pora sapna dikhise aru tar bisna te tar matha bhitor te darshan khan dikhise. Kotha khan chutu kori kene tai hei sapna tu likhise.

Daniel pora koise, “Moi laga rati laga darshan te, sorgo laga charta hawa pora dangor samundar ke hila di thaka moi dikhise. Aru charta dangor janwar samundar pora uthi ahise, ekta-ekta sob alag-alag thakise.

Prothom janwar tu singho nisena thakise, aru eitu ke cheel laga pakha thakise. Tar pakha khan phati nojua tak moi sai thakise; eitu ke matira pora uthai loise, aru manuh nisena duita theng te khara korai dise, aru eitu ke manuh laga mon dise.

Dusera janwar ekta dikhise, bhalu nisena, ekphale uthai rakhise, aru tar mukh te, tar daant majot te, tinta pasli thakise. Eitu ke koise, ‘Uthibi, bisi mangso khabi.’

Eitu pichete moi sai thakise, dusra janwar ekta, chituwa nisena, tar pichete charta chiriya laga pakha thakise, charta matha thakise, aru eitu ke raj kori bole adhikar dise.

Eitu pichete, moi laga rati laga darshan te, chauthi janwar ekta dikhise—bhoyanok, bhoi lagai diya, bisi takatman, aru dangor loha laga daant thakise. Eitu pora khai dise, pisi dise, aru baki thaka khan ke theng tolte chipai dise; eitu laga age te thaka sob janwar pora alag thakise, aru eitu ke dosta seeng thakise. Moi hei seeng khan ke sai thaka homoi te, dusra ekta—chutu seeng ekta—taikhan majot pora uthise, aru prothom seeng khan majot pora tinta eitu age te ukhari phelai dise. Eitu ke manuh laga suku nisena suku thakise, aru dangor kotha kowa mukh ekta thakise.

Moi sai thaka homoi te, singhason khan rakhi dise, aru Purana Din laga Ekjon, amar Pitri, Tar singhason te bohise. Tar laga kapra tu borop nisena boga thakise; Tar matha laga chuli tu sapha bheda chuli nisena thakise. Tar singhason tu jui pora juli thakise, aru tar chaka khan sob jui te juli thakise. ^a Jui laga ekta nodi ulai kene Tar age pora boi thakise. Hajar-hajar manuh pora Tar sewa korise, aru dos-hajar uporte dos-hajar manuh Tar age te khara thakise. Bisar sabha bohise, aru kitab khan khuli dise.

Hei seeng pora kowa dangor kotha khan nimite moi sai thakise; hei janwar ke namora tak moi sai thakise, aru tar gaw khotom kori kene juli thaka jui te di dise. Baki janwar khan laga adhikar harai dise, kintu ekta thik kora homoi aru somoi tak tarkhan laga jivon lamba kori dise.

Moi laga rati laga darshan te moi saise, aru sabi, sorgo laga badal khan logote ahi thaka, manuh laga putro nisena ekjon thakise. Tai Purana Din laga Ekjon, amar Pitri, usorte ahise, aru Tar ke Tar age te loi jaise. ^b Aru Tar ke adhikar, mohima, aru ekta rajyo dise, titia sob manuh, desh, aru bhasha khan pora Tar sewa koribo. Tar raj tu ekta ananta raj ase juntu kitia bhi harai najabo, aru Tar rajyo tu eneka ase juntu kitia bhi khotom nohobo.

Darshan ke Bujai Diya

Moi, Daniel, laga atma dukh paise, aru moi laga mon te aha darshan khan pora moi ke bhoi lagai dise. Ta te khara thaka ekjon usorte moi ahise, aru eitu sob laga hosa kotha tar ke hudise. Tai eitu laga motlob dikhai kene moi ke koise.

‘Eitu charta dangor janwar khan tu charjon raja ase, jun prithibi pora uthibo. Kintu Sobse Uporte thaka amar Pitri laga pobitro manuh khan pora rajyo tu grohon koribo aru hodai nimite, hodai aru hodai nimite rakhibo.

Titia chauthi janwar laga hosa kotha janibole moi mon korise, juntu baki sob pora alag thakise—sobse bhoi lagai diya, loha laga daant, pittol laga nakhun—juntu pora khai dise, pisi dise, aru baki thaka khan ke theng tolte chipai dise. Aru tar matha te thaka dosta seeng laga bisoi te, aru dusra seeng juntu uthise jun age te tinta giri jaise—hei seeng juntu ke suku thakise aru dangor kotha kowa mukh thakise, aru baki khan pora dangor nisena dikhise—eitu khan bhi moi janibole mon korise. Moi sai thaka homoi te, hei seeng pora pobitro manuh khan bhirodh te lorai kori thakise, aru tarkhan ke harai di thakise, jitia tak Purana Din laga Ekjon, amar Pitri, ahise, aru Sobse Uporte thaka amar Pitri laga pobitro manuh khan nimite bisar dise, aru pobitro manuh khan laga rajyo rakhibole homoi ahise.’

Tai koise, ‘Chauthi janwar tu prithibi te chauthi rajyo ase, juntu baki sob rajyo pora alag ase. Eitu pora pura prithibi ke khai dibo, theng tolte chipabo, aru pisi dibo. Hei dosta seeng tu: eitu rajyo pora dosjon raja uthibo. Tarkhan pichete dusra ekjon uthibo, jun prothom khan pora alag ase, aru tai tinjon raja ke harai dibo. Tai Sobse Uporte thaka amar Pitri bhirodh te kotha kobo, Sobse Uporte thaka amar Pitri laga pobitro manuh khan ke dukh dibo, aru thik kora homoi aru niyom ke bodli koribole kosis koribo. Pobitro manuh khan ke ekta homoi, homoi khan, aru adha homoi tak tar hath te di dibo. ^c

Kintu bisar sabha bisar koribole bohibo, aru tar raj tu loi lobo, hodai nimite khai dibo aru khotom kori dibo. Sorgo laga nichete thaka sob rajyo laga rajyo, raj, aru dangor-pon tu manuh khan ke, Sobse Uporte thaka amar Pitri laga pobitro manuh khan ke dibo. Tar rajyo tu ekta khotom nathaka rajyo ase; sob raja khan pora Tar sewa koribo aru Tar kotha manibo.’

Yate kotha tu khotom hoise. Moi, Daniel—moi laga bhabona pora moi ke bhoi lagai dise, moi laga chehera boga hoi jaise, kintu eitu moi nijor logote rakhise.”