Kidung Anyar kanggo Salumahing Bumi

Kidung anyar iki kidung pekabaran — wartakna pakaryane Rama kita ana ing antarane para bangsa, padha nggawaa pisungsung, kandhanana yen Panjenengane jumeneng Ratu. Allah-allah liyane iku mung gaweyane tangan kang tanpa guna. Malah segara, pategalan lan wit-witan ing alas uga diajak surak-surak mapag Hakim kang rawuh.

Pasal 96.

Padha ngidunga kidung anyar marang Rama kita; padha ngidunga marang Rama kita, he salumahing bumi.

Padha ngidunga marang Rama kita, memujia asmane; padha martakna karahayone saben dina. Padha ngabarna pakaryane kang mulya ana ing antarane para bangsa, pakaryane kang ngeram-eramake ana ing antarane sakehing umat. Awit Rama kita iku agung lan kang sakalangkung pantes kaalembana; Panjenengane kang kudu diwedeni ngungkuli sakehing allah. Awit sakehing allahe para bangsa iku mung brahala, nanging Rama kita kang nitahake langit. Kaluhuran lan kaagungan ana ing ngarsane; karosan lan kaendahan ana ing papan pasucene.

Padha saosna marang Rama kita, he sakehing brayate para bangsa, saosna marang Rama kita kamulyan lan karosan. Padha saosna marang Rama kita kamulyan kang laras karo asmane; padha nggawaa pisungsung, sarta lumebua ing platarane. Padha nyembaha marang Rama kita kanthi kaendahaning kasucen; padha gumetera ana ing ngarsane, he salumahing bumi. Padha kandhaa ana ing antarane para bangsa, “Rama kita jumeneng Ratu! Jagad iki tetep santosa, ora bakal gonjing. Panjenengane bakal ngadili para bangsa kanthi adil.”

Langit padha bungaha, lan bumi padha giyaka; sagara padha gumuruha, dalah saisine kabeh. Pategalan padha surak-suraka, dalah samubarang kang ana ing kono; tumuli sakehing wit-witan ing alas bakal padha surak-surak kabungahan. Ana ing ngarsane Rama kita, awit Panjenengane rawuh, awit Panjenengane rawuh ngadili bumi. Panjenengane bakal ngadili jagad kanthi kabeneran, sarta para bangsa kanthi kasetyane.