Mukunga ya Mpa samu na Ntoto Nyonso
Mukunga ya mpa kele ya kusamuna — samuna mavanga ya Tata ya beto na kati ya bayinsi, nata munkayulu, zabisa bawu ti yandi ke yala. Banzambi ya nkaka kele biteki ya maboko ya bantu, bima ya mpamba. Ata mubu, bilanga mpe bayinti ya mfinda, ba ke tula bawu samu ti bawu yangalala na ntwala ya yina ke kwiza na kufundisa.
96 1Beno yimbila mukunga ya mpa samu na Tata ya beto; beno yimbila samu na Tata ya beto, ntoto nyonso.
2Beno yimbila samu na Tata ya beto, beno sakumuna nkumbu ya yandi; beno samuna mpulusu ya yandi kilumbu na kilumbu. 3Beno samuna mavanga ya yandi ya nkembo na kati ya bayinsi, bisalu ya yandi ya ngitukulu na kati ya bantu nyonso. 4Samu ti Tata ya beto kele muntu ya nene, mpe yandi fwana mingi na lukumu; bantu fwana kuvwanda na boma ya yandi kuluta banzambi nyonso. 5Samu ti banzambi nyonso ya bantu kele biteki, kasi Tata ya beto yidikaka mazulu. 6Nkembo mpe bunene kele na ntwala ya yandi; ngolo mpe kitoko kele na Yinzo ya yandi ya longo.
7Beno pesa na Tata ya beto, beno makanda nyonso ya bantu, beno pesa na Tata ya beto nkembo mpe ngolo. 8Beno pesa na Tata ya beto nkembo yina fwana na nkumbu ya yandi; beno nata munkayulu, mpe beno kota na mapango ya yandi. 9Beno sambila Tata ya beto na nkembo ya bulongo; beno tekita na ntwala ya yandi, ntoto nyonso. 10Beno tuba na kati ya bayinsi: «Tata ya beto ke yala! Yinza me telama ngolo; yawu ke ningana ata fyoti ve. Yandi ke fundisa bantu na kudedama.»
11Bika ti mazulu kuvwanda na kyese, mpe bika ti ntoto kuyangalala; bika ti mubu kuwakisa makelele, mpe bima nyonso yina ke fulusa yawu. 12Bika ti bilanga kuyangalala, mpe bima nyonso yina kele na yawu; na yina bayinti nyonso ya mfinda ke yimbila na kyese. 13Na ntwala ya Tata ya beto, samu ti yandi ke kwiza, samu ti yandi ke kwiza na kufundisa ntoto. Yandi ke fundisa yinza na mambu ya kudedama, mpe bantu na kukwikama ya yandi.