Abụ Ọhụrụ nye Ụwa Niile
Abụ ọhụrụ ahụ bụ nke ozi ọma — kpọsaa ọrụ Nna anyị n'etiti mba niile, weta onyinye, gwa ha na ọ na-achị. Chi ndị ọzọ bụ ihe efu e ji aka mee. Ọbụna oké osimiri, ubi na osisi nke ọhịa ka a na-akpọ ka ha ṅụrịa ọṅụ maka Onyeikpe na-abịa.
96 1Bụkuonụ Nna anyị abụ ọhụrụ; bụkuonụ Nna anyị, ụwa niile.
2Bụkuonụ Nna anyị, gọzienụ aha ya; kwusaanụ nzọpụta ya kwa ụbọchị. 3Kwupụtanụ ọrụ ebube ya nʼetiti mba dị iche iche, ọrụ ịtụnanya ya nʼetiti ndị niile. 4Nʼihi na Nna anyị dị ukwuu, bụrụkwa onye kwesịrị otuto nke ukwuu; a ga-atụ egwu ya karịa chi niile. 5Nʼihi na chi niile nke ndị mba ọzọ bụ arụsị, ma Nna anyị kere eluigwe. 6Nsọpụrụ na ebube dị nʼihu ya; ike na ịma mma dị nʼebe nsọ ya.
7Nyenụ Nna anyị, unu ikwu niile nke ndị mba, nyenụ Nna anyị otuto na ike. 8Nyenụ Nna anyị otuto ruru aha ya; wetanụ onyinye, baanụ nʼogige ya. 9Feenụ Nna anyị nʼebube nke ịdị nsọ; maanụ jijiji nʼihu ya, ụwa niile. 10Kwupụtanụ nʼetiti mba niile, sị, “Nna anyị na-achị achị! E guzosiela ụwa ike; a gaghị enugharị ya ma ọlị. Ọ ga-eji izi ezi kpee ndị mmadụ ikpe.”
11Ka eluigwe ṅụrịa ọṅụ, ka ụwa nwee obi ụtọ; ka oke osimiri bigbọọ, ya na ihe niile jupụtara nʼime ya. 12Ka ala ubi ṅụrịa, ya na ihe niile dị nʼime ya; mgbe ahụ osisi niile nke ọhịa ga-abụ abụ nʼihi ọṅụ. 13Nʼihu Nna anyị, nʼihi na ọ na-abịa, nʼihi na ọ na-abịa ikpe ụwa ikpe. Ọ ga-eji ezi omume kpee ụwa ikpe, jirikwa ikwesi ntụkwasị obi ya kpee ndị mmadụ ikpe.
