መዝሙር 96

96 ¹ለአባታችን አዲስ መዝሙር ዘምሩ፤ ምድር ሁሉ፣ ለአባታችን ዘምሩ።

²ለአባታችን ዘምሩ፣ ስሙን ባርኩ፤ ዕለት ዕለት ማዳኑን አውጁ። ³ክብራማ ሥራዎቹን በአሕዛብ መካከል፣ ድንቅ ሥራዎቹን በሕዝቦች ሁሉ መካከል ተናገሩ። ⁴አባታችን ታላቅና እጅግ የተመሰገነ ነውና፤ ከአማልክት ሁሉ በላይ ሊፈራ የተገባው ነው። ⁵የሕዝቦች አማልክት ሁሉ ጣዖታት ናቸውና፤ አባታችን ግን ሰማያትን ሠራ። ⁶ግርማና ክብር በፊቱ አሉ፤ ኀይልና ውበት በመቅደሱ ውስጥ ናቸው።

⁷የሕዝቦች ወገኖች ሁሉ፣ ለአባታችን ስጡ፤ ክብርንና ኀይልን ለአባታችን ስጡ። ⁸ለስሙ የሚገባውን ክብር ለአባታችን ስጡ፤ መባ ይዛችሁ ወደ አደባባዮቹ ግቡ። ⁹አባታችንን በቅድስና ግርማ አምልኩ፤ ምድር ሁሉ፣ በፊቱ ተንቀጥቀጡ። ¹⁰በአሕዛብ መካከል፣ “አባታችን ነግሦአል! ዓለም በጽኑ ተመሥርቷል፤ ከቶ አይነቃነቅም። ሕዝቦችን በቅንነት ይፈርዳል” በሉ።

¹¹ሰማያት ደስ ይበላቸው፣ ምድርም ሐሴት ታድርግ፤ ባሕር ይጓጓ፣ የሞላበትም ሁሉ። ¹²ሜዳ ደስ ይበለው፣ በውስጡ ያለውም ሁሉ፤ ያን ጊዜ የዱር ዛፎች ሁሉ በደስታ ይዘምራሉ። ¹³በአባታችን ፊት፣ እርሱ ይመጣልና፣ ምድርን ሊፈርድ ይመጣልና። ዓለምን በጽድቅ፣ ሕዝቦችንም በታማኝነቱ ይፈርዳል።