Kaodak pendou shanga chia haanbü che
Chia haanbü kho khümenbü ngetibü ki—phangshuong yoa seneibü Boueibü kümsilei phinthonashi, lembü sungbashi, haoei songdakda dogo lenashi. Aeibou mühghaü shuong kho müt ikei kümbü aokibü ki. Yungnyu, sek hoba yam bulong shuong pendouei jiei loubü matjembou shanga olinyolabü.
96 1Seneibü Bou la chia haanbü che atkushi; O kaodak pendou, seneibü Bou la chia atkushi.
2Seneibü Bou la chia atkushi, haoeibü nyen haükushi; haoeibü khümenbü chaloua chaloua phinthonashi. 3Phangshuong yoa haoeibü soneikangbü kümsilei phinthonashi, müt pendou yoa haoeibü seikümseilei phinthonashi. 4Aishanga seneibü Bou kho yaangbü ki hoba aeibou nyensangla muan ki; hao kho mühghaü pendou thüka hatlabü. 5Aishanga phangshuongeibü mühghaü pendou kho heangsho ki, lausikei seneibü Bouei müh yaükei. 6Soneikangbü hoba yaangenbü hao thedanga ki; hau hoba hemaibü haoeibü lemshang ka ki.
7O phangshuong chemdang pendou, seneibü Bou la nyensang kuashi, seneibü Bou la soneikangbü hoba hau nyensang kuashi. 8Seneibü Bou la haoeibü nyen shanga mubü soneikangbü nyensang kuashi; lembü che sungbashi, hoba haoeibü khongnyu to loushi. 9Saopobü soneikangbüa seneibü Bou to lemashi; O kaodak pendou, hao thedanga lühashi. 10Phangshuong yoa lenashi, “Seneibü Bouei songdakda! Kaodak kho kaangkhühtham yaükei; kho ladangkei amautilabü. Haoei phangshuong to ngühmaia matjemlabü.”
11Khuthük olinashi, hoba kaodak olinyoashi; yungnyu hoba khünei kibü pendouei ngühtiashi. 12Sek olinyoashi, hoba khünei kibü pendou; kheijinei yam bunyu pendouei olinyoko chia laulabü. 13Seneibü Bou thedanga, aishanga hao loulabü, aishanga kaodak matjemla hao loulabü. Haoei kaodak to saopobüa matjemlabü, hoba phangshuong to haoeibü maanglembüa matjemlabü.
