Okathui saikorawui vang laa kadhar akha
Laa kathar chi yurbingli khangachang laana — ithumwui Avāwui otsakbing yurbingli hāngchitheilu, kachamei khuirālu, ana mungda lei da hāngmilu. Ngachei varebing chi pāngna sākakhui ot mānga. Tara̱, lui eina ngahan thingbingla rākhangarā bichar kasāmi chili masotkhavai khoramana.
96 1Ithumwui Avāli laa kadhar akha sālu; okathui hupta ithumwui Avāli solu.
2Ithumwui Avāli solu, amingli solu; thangkachida awui huikhami tui hāngmilu. 3Awui tekhamatei otsak miyur saikorali chishātlu, awui matakhak kahai otsak mibing saikorali hānglu. 4Kaja ithumwui Avā hakmahālaka; khorumphalungra eina khayāshilak, vare saikorawuitungli lāngda ali ngacheerang phaningra. 5Kaja miwui varebing meoma̱ mānga; kha kazingram ithumwui Avāna sai. 6Khangamla, khayākakāla awui mangāli lei; yāng kala khamathāla awui katharapamli leisera.
7Ithumwui Avāli mikharān milu, O miyurwui shimkhur saikora, tekhamatei kala pangshap ithumwui Avāli mikharān milu. 8Amingwui tekhamatei ithumwui Avāli milu; kachigat khuirāda awui kayāngli ngasalu. 9Kathara sāri sāda ithumwui Avāli khorumlu; okathui hupta ali ngacheelu. 10Miyur saikorali hānglu, "Ithumwui Avāna munga! Apuk-apaga sakāhaira; mangatha̱luilakmara. Ana mibingli mashun eina bichar sāra."
11Kazingramna mathānranu, okathuina ringphāranu; ngayi kala chiwui lungli khaleibingna ngaphaoranu. 12Luiwuk kala chiwui lungli khalei huptana mathānranu; chieina ngahong thing saikorana khamathānwui vang laa sāra. 13Ithumwui Avāwui mangāli, kaja ana rai, kaja ana okathuili bichar sākhavai rai. Ana apuk-apagali khamashung khangarong eina bichar sāra, kala mibingli awui ningkatong eina bichar sāra.
