መዝሙር 36

36 ¹ዐመፅ በክፉው ሰው ልብ ጥልቅ ውስጥ ይናገራል፤ በዐይኖቹ ፊት የአባታችን ፍርሃት የለም።

²በገዛ ዐይኑ ራሱን እጅግ ስለሚያሞካሽ፣ ኀጢአቱን ሊያውቅ ወይም ሊጠላ አይችልም። ³የአፉ ቃላት ክፋትና ተንኰል ናቸው፤ በጥበብ መመላለስንና መልካም ማድረግን ተወ። ⁴በመኝታውም ላይ እንኳ ክፋትን ያውጠነጥናል፤ መልካም ባልሆነ መንገድ ላይ ራሱን ያቆማል፤ ክፉ የሆነውን አይጸየፍም።

⁵አባታችን ሆይ፣ የቃል ኪዳን ፍቅርህ እስከ ሰማያት ይደርሳል፤ ታማኝነትህም እስከ ደመናት። ⁶ጽድቅህ እንደ ኀያላን ተራሮች ነው፤ ፍርዶችህም እንደ ታላቅ ጥልቅ ናቸው፤ ሰውንም እንስሳንም ታድናለህ፣ አባታችን ሆይ። ⁷የቃል ኪዳን ፍቅርህ እንዴት የከበረ ነው፣ አባታችን ሆይ! ሰዎች ሁሉ በክንፎችህ ጥላ ሥር ይጠለላሉ። ⁸ከቤትህ ብዛት ይጠግባሉ፤ ከደስታህ ወንዝም ታጠጣቸዋለህ። ⁹የሕይወት ምንጭ ከአንተ ዘንድ ነውና፤ በብርሃንህ ብርሃንን እናያለን።

¹⁰የቃል ኪዳን ፍቅርህን ለሚያውቁህ፣ ጽድቅህንም ልበ ቅኖች ለሆኑት አስቀጥል። ¹¹የትዕቢተኛው እግር አይርገጠኝ፤ የክፉውም እጅ አያባርረኝ። ¹²ክፉ አድራጊዎች በዚያ ወደቁ፤ ተጥለው መነሣት ተሳናቸው።