ሚልክያስ 3

3 ¹እነሆ፣ መልእክተኛዬን እልካለሁ፤ እርሱም በፊቴ መንገድን ያዘጋጃል። ከዚያም የምትፈልጉት ጌታ በድንገት ወደ መቅደሱ ይመጣል፤ እርሱም የምትደሰቱበት የኪዳኑ መልእክተኛ ኢየሱስ ነው። እነሆ፣ ይመጣል፤ ይላል የሰማይ ሠራዊት አባት። ^a a v1 መንገድን የሚያዘጋጀው መልእክተኛ መጥምቁ ዮሐንስ ነው፤ ወደ መቅደሱ የሚመጣው ጌታ ደግሞ ኢየሱስ ነው፤ እርሱም የኪዳኑ መልእክተኛ ነው። ማርቆስ ወንጌሉን በእነዚህ ቃላት ይከፍታል (ማርቆስ 1፥2)። ²“እርሱ በሚመጣበት ቀን ግን ማን ሊጸና ይችላል? እርሱ በሚገለጥበት ጊዜስ ማን ሊቆም ይችላል? እርሱ እንደ አንጥረኛ እሳት፣ እንደ አጣቢ ሳሙና ነው። ³እርሱ ብሩን እያጠራና እያነጻ ይቀመጣል፤ የሌዊን ልጆች ያነጻል፤ እንደ ወርቅና እንደ ብር ያጠራቸዋል፤ እነርሱም በጽድቅ ለአባታችን መሥዋዕትን ያቀርባሉ። ⁴ከዚያም እንደ ቀደሙት ዘመናት፣ እንደ ቀደሙት ዓመታት የይሁዳና የኢየሩሳሌም መሥዋዕት አባታችንን ደስ ያሰኘዋል።”

⁵ልፈርድባችሁ እቀርባለሁ፤ በጠንቋዮች፣ በአመንዝሮች፣ በሐሰት በሚምሉ፣ ሠራተኛውን ደመወዙን በሚያታልሉ፣ መበለቲቱንና ድሀ አደጉን በሚጨቍኑ፣ መጻተኛውን ወደ ጎን በሚያገሉና የማይፈሩኝ ላይ ፈጣን ምስክር እሆናለሁ፤ ይላል የሰማይ ሠራዊት አባት።

ወደ አባታችሁ ተመለሱ

⁶እኔ አባታችሁ አልለወጥምና፤ ስለዚህ እናንተ የያዕቆብ ልጆች አልጠፋችሁም።

⁷ከአባቶቻችሁ ዘመን ጀምሮ ከሥርዐቴ ፈቀቅ ብላችኋል፤ አልጠበቃችኋቸውም። ወደ እኔ ተመለሱ፤ እኔም ወደ እናንተ እመለሳለሁ፤ ይላል የሰማይ ሠራዊት አባት። እናንተ ግን፣ ‘እንዴት እንመለስ?’ ትላላችሁ።

⁸ሰው አባቱን ይሰርቃልን? እናንተ ግን ትሰርቁኛላችሁ። እናንተ ግን፣ ‘እንዴት ሰረቅንህ?’ ትላላችሁ። በዐሥራትና በመባ ነው። ⁹እናንተ መላው ሕዝብ ትሰርቁኛላችሁና በእርግማን ተረግማችኋል። ¹⁰በቤቴ ምግብ እንዲኖር ሙሉውን ዐሥራት ወደ ግምጃ ቤት አምጡ። በዚህ ፈትኑኝ፤ ይላል የሰማይ ሠራዊት አባት፤ የሰማይን መስኮቶች ባልከፍትላችሁ፣ የተትረፈረፈ በረከትንም እስኪበቃችሁ ድረስ ባላፈስስላችሁ እዩ። ¹¹ስለ እናንተ በላዒውን እገሥጸዋለሁ፤ የምድራችሁን ፍሬ አያጠፋም፤ በዕርሻም ያለው ወይናችሁ ፍሬ ማፍራቱ አይቀርም፤ ይላል የሰማይ ሠራዊት አባት። ¹²ከዚያም የተወደደች ምድር ትሆናላችሁና አሕዛብ ሁሉ ብፁዓን ይሉአችኋል፤ ይላል የሰማይ ሠራዊት አባት።

¹³ቃላችሁ በእኔ ላይ ጨካኝ ነበር፤ ይላል አባታችን። እናንተ ግን፣ ‘በአንተ ላይ ምን ተናግረናል?’ ትላላችሁ።

¹⁴እናንተ፣ ‘እግዚአብሔርን ማገልገል ከንቱ ነው። ትእዛዙን በመጠበቃችንና በሰማይ ሠራዊት አባት ፊት እንደ አልቃሾች በመሄዳችን ምን አተረፍን?’ ብላችኋል። ¹⁵አሁንም ትዕቢተኞችን ብፁዓን እንላለን። ክፉ የሚያደርጉ ይለማሉ፤ እግዚአብሔርን እንኳ ይፈትናሉ፤ ያመልጣሉም።

¹⁶ከዚያም አባታችንን የሚፈሩ እርስ በርሳቸው ተነጋገሩ፤ እርሱም አዳመጠ፤ ሰማም። እርሱን ለሚፈሩትና ስሙን ለሚያከብሩት በፊቱ የመታሰቢያ መጽሐፍ ተጻፈ።

¹⁷በምሠራበት ቀን እነርሱ የእኔ፣ የተወደደ ርስቴ ይሆናሉ፤ ይላል የሰማይ ሠራዊት አባት። አባት የሚያገለግለውን ልጁን እንደሚራራለት እኔም እራራላቸዋለሁ። ¹⁸ዳግመኛም በጻድቁና በክፉው መካከል፣ አባታችንን በሚያገለግለውና በማያገለግለው መካከል ያለውን ልዩነት ታያላችሁ።