Malakaị 3 FHB Father's Heart Bible™

3 ¹Lee, ana m ezipu onye ozi m, ọ ga-edozikwa ụzọ nʼihu m. Mgbe ahụ, na mberede, Onyenwe anyị ahụ unu na-achọ ga-abịa nʼụlọnsọ ukwu ya—onye ozi nke ọgbụgba ndụ ahụ unu na-enwe mmasị nʼime ya. Lee, ọ na-abịa, ka Nna nke usuu ndị agha eluigwe na-ekwu. ^a a v1 Onye ozi ahụ na-edozi ụzọ bụ Jọn Omee Baptizim, Onyenwe anyị ahụ na-abịa nʼụlọnsọ ukwu ya bụkwa Jisọs — onye ozi nke ọgbụgba ndụ ahụ. Mak ji kpọmkwem okwu ndị a malite Oziọma ya (Mak 1:2), Jisọs jikwa ha kọwaa Jọn (Luk 7:27). ²“Ma onye pụrụ ịnagide ụbọchị ọ ga-abịa? Onye pụrụ iguzosi ike mgbe ọ ga-apụta? Nʼihi na ọ dị ka ọkụ onye na-anụcha ọla, dịka ncha onye na-asa ákwà. ³Ọ ga-anọdụ ala na-anụcha, na-asachapụ ọlaọcha; ọ ga-asachapụ ụmụ Livaị, nụchaa ha dịka ọla edo na ọlaọcha, ha ga-ewetakwara Nna anyị onyinye nʼime ezi omume. ⁴Mgbe ahụ, onyinye Juda na Jerusalem ga-atọ Nna anyị ụtọ, dịka ọ dị nʼoge gara aga, dịka ọ dị nʼafọ ndị mbụ.”

⁵Aga m abịaru nso ikpe unu ikpe, bụrụ onye akaebe na-eme ngwa ngwa megide ndị mgbaasị, ndị na-akwa iko, ndị na-aṅụ iyi ụgha, ndị na-aghọgbu onye ọrụ nʼụgwọ ọrụ ya, ndị na-emegbu nwanyị di ya nwụrụ na nwa mgbei, ndị na-achụpụ ọbịa, na ndị na-atụghị egwu m, ka Nna nke usuu ndị agha eluigwe na-ekwu.

Laghachikwutenụ Nna Unu

⁶Nʼihi na mụ onwe m, bụ Nna unu, adịghị agbanwe; nʼihi ya, unu bụ ụmụ Jekọb, a laghị unu nʼiyi.

⁷Site nʼoge nna nna unu ha, unu esiela nʼụkpụrụ m wezuga onwe unu, unu edebeghịkwa ha. Laghachikwutenụ m, m ga-alaghachikwute unu, ka Nna nke usuu ndị agha eluigwe na-ekwu. Ma unu na-ajụ, sị, ‘Olee otú anyị ga-esi laghachi?’

⁸Mmadụ ọ ga-ezu Nna ya ohi? Ma unu na-ezu m ohi. Ma unu na-ajụ, sị, ‘Olee otú anyị si zuo gị ohi?’ Nʼime otu ụzọ nʼụzọ iri na nʼonyinye niile. ⁹A bụọla unu ọnụ nke ọnụ, nʼihi na unu na-ezu m ohi—unu niile bụ mba a. ¹⁰Wetanụ otu ụzọ nʼụzọ iri niile nʼụlọ akụ, ka nri dịrị nʼụlọ m. Nwaanụ m nʼihe a, ka Nna nke usuu ndị agha eluigwe na-ekwu, ka unu hụ ma m gaghị emeghere unu mpio eluigwe, wụsakwara unu ngọzi ruo mgbe mkpa ọ gaghị adịkwa. ¹¹Aga m abara unu onye na-eripịa ihe mba, ka ọ ghara ịla mkpụrụ ala unu nʼiyi, ka osisi vaịnị unu nke dị nʼubi gharakwa ịgbaghara ịmị mkpụrụ, ka Nna nke usuu ndị agha eluigwe na-ekwu. ¹²Mgbe ahụ, mba niile ga-akpọ unu ndị a gọziri agọzi, nʼihi na unu ga-abụ ala ọṅụ, ka Nna nke usuu ndị agha eluigwe na-ekwu.

¹³Okwu unu siri ike megide m, ka Nna anyị na-ekwu. Ma unu na-ajụ, sị, ‘Gịnị ka anyị kwuru megide gị?’

¹⁴Unu sịrị, ‘Ife Chineke bụ ihe efu. Uru gịnị ka anyị ritere nʼidebe ihe o nyere anyị, na ije ije dịka ndị na-eru ụjụ nʼihu Nna nke usuu ndị agha eluigwe?’ ¹⁵Ugbu a, anyị na-akpọ ndị mpako ndị a gọziri agọzi. Ndị na-eme ihe ọjọọ na-agakwa nke ọma; ha na-anwa ọbụna Chineke ma na-agbanarị.

¹⁶Mgbe ahụ, ndị na-atụ egwu Nna anyị gwarịtara ibe ha okwu, o gekwara ntị, nụ ihe ha kwuru. E dere akwụkwọ mpịakọta ncheta nʼihu ya banyere ndị na-atụ egwu ya, ndị na-eji aha ya kpọrọ ihe.

¹⁷Ha ga-abụ nke m, ka Nna nke usuu ndị agha eluigwe na-ekwu, nʼụbọchị ahụ m ga-eme ihe, ha ga-abụ akụ m kpọrọ ihe. Aga m emere ha ebere dịka nna si emere nwa ya nke na-ejere ya ozi ebere. ¹⁸Ọzọkwa, unu ga-ahụ ọdịiche dị nʼetiti onye ezi omume na onye ajọ omume, nʼetiti onye na-ejere Nna anyị ozi na onye na-ejeghị ya ozi.