እቲ መልእኽተኛ ከፅሪ ይመፅእ

መልእኽተኛ መንገዲ ኼዳሉ ይመፅእ ኣሎ፥ ናይ መፃረዪ ሓዊ ግና ዜጥዕም ኣይኮነን። እቲ ክሲ ብዓስራትን ብመስዋእትን ምኽታር እዩ፥ ምስኡ ኸዓ ንኣቦና ክፍትንዎ ዕድመ ቐረበ። እቶም ዝፈርሕዎ ንስንሳቶም ተዛረቡ፥ መፅሓፍ መዘከሪ ድማ ተፅሓፈ።

ምዕራፍ 3።

እንሆ፥ ኣነ መልእኽተኛይ እልእኽ ኣለኹ፥ ንሱ ኸዓ ኣብ ቅድመይ መንገዲ ኼዳሉ እዩ። ሽዑ እቲ እትደልይዎ ጐይታ፥ እቲ እትሕጐሱሉ መልእኽተኛ ኪዳን፥ ብድንገት ናብ ቤተ መቕደሱ ክመፅእ እዩ። እንሆ፥ ይመፅእ ኣሎ፥ ይብል ኣሎ ኣቦ ሰራዊት ሰማይ። ^a “መዓልቲ ምፅኣኡ ክፃወር ዝኽእል መን እዩ? ምስ ተገልፀ ደው ክብል ዝኽእል መን እዩ? ንሱ ኸም ሓዊ መፃረዪ፥ ከም ሳሙና ሓፃቢ እዩ። ብሩር እናኣፃረየን እናኣንፀሀን ክቕመጥ እዩ፤ ንደቂ ሌዊ ኸዓ ኼንፅሆም፥ ከም ወርቅን ብሩርን ድማ ኼፃርዮም እዩ፤ ንሳቶም ከዓ ንኣቦና ብፅድቂ መስዋእቲ ኼቕርቡ እዮም። ሽዑ መስዋእቲ ይሁዳን ኢየሩሳሌምን፥ ከምቲ ናይ ቀደም መዓልቲታት፥ ከምቲ ናይ ቀደም ዓመታት፥ ንኣቦና ባህ ኬብሎ እዩ።”

ክፈርደኩም ድማ ክቐርብ እየ፤ ኣብ ልዕሊ ጠንቈልትን ኣመንዝራታትን፥ ብሓሰት ዝምሕሉን፥ ንሰራሕተኛ ዓስቡ ዘታልሉን፥ ንመበለትን ደኽታምን ዝግፍዑን፥ ንስደተኛ ዝደፍኡን፥ ንኣይ ድማ ዘይፈርሑን፥ ቅልጡፍ ምስክር ክኸውን እየ፥ ይብል ኣሎ ኣቦ ሰራዊት ሰማይ።

ናብ ኣቦኻትኩም ተመለሱ

ኣነ ኣቦኻትኩም ኣይልወጥን እየ እሞ፥ ንስኻትኩም ደቂ ያእቆብ ኣይጠፋእኩምን።

ካብ መዓልቲታት ኣቦታትኩም ጀሚርኩም ካብ ስርዓታተይ ረሓቕኩም፥ ኣይሓለኹምዎምን። ናባይ ተመለሱ፥ ኣነ ድማ ናባኻትኩም ክምለስ እየ፥ ይብል ኣሎ ኣቦ ሰራዊት ሰማይ። ንስኻትኩም ግና ‘ከመይ ጌርና ኢና እንምለስ?’ ትብሉ ኣለኹም።

ሰብ ንኣቦኡ ይኸትሮዶ? ንስኻትኩም ግና ትኸትሩኒ ኣለኹም። ንስኻትኩም ግና ‘ብምንታይ ኢና ዝኸተርናካ?’ ትብሉ ኣለኹም። ብዓስራትን ብመስዋእትን። ብመርገም ርጉማት ኢኹም፥ ንስኻትኩም ብዘሎ ህዝቢ ንኣይ ትኸትሩ ኣለኹም እሞ። ምሉእ ዓስራት ናብ መኽዘን ኣምፅኡ፥ ኣብ ቤተይ ምግቢ ምእንቲ ኽህሉ። በዙይ ፈትኑኒ፥ ይብል ኣሎ ኣቦ ሰራዊት ሰማይ፤ መሳዅቲ ሰማይ ከፊተ፥ ክሳዕ ዘየድልየኩም በረከት ኣየፍስሰልኩምን እንተ ኾይነ ርኣዩ። ነቲ በላዒ ምእንታኹም ክገንሖ እየ፥ ፍረ ምድሪኹም ምእንቲ ኸየጥፍእ፤ ኣብ ግራት ዘሎ ወይንኹም ድማ ፍሬ ዘይብሉ ኣይኸውንን፥ ይብል ኣሎ ኣቦ ሰራዊት ሰማይ። ሽዑ ኵሎም ኣህዛብ ብፁኣን ክብሉኹም እዮም፥ ባህ እተብል ምድሪ ክትኮኑ ኢኹም እሞ፥ ይብል ኣሎ ኣቦ ሰራዊት ሰማይ።

ዘረባኹም ኣብ ልዕለይ ከቢድ ነበረ፥ ይብል ኣሎ ኣቦና። ንስኻትኩም ግና ‘ኣብ ልዕሌኻ እንታይ ተዛሪብና?’ ትብሉ ኣለኹም።

ንስኻትኩም ‘ንእግዚኣብሄር ምግልጋል ከንቱ እዩ። ትእዛዙ ብምሕላውናን ኣብ ቅድሚ ኣቦ ሰራዊት ሰማይ ከም ሓዘንተኛታት ኴንና ብምኻድናን እንታይ ረቢሕና?’ በልኩም። ሕዚ ንዕቡያት ብፁኣን ንብሎም ኣለና። እቶም ክፉእ ዝገብሩ ይሰልጦም፤ ንእግዚኣብሄር እኳ ይፍትንዎ፥ የምልጡውን።

ሽዑ እቶም ንኣቦና ዝፈርሑ ንሓድሕዶም ተዛረቡ፤ ንሱ ኸዓ ሰምዐ ኣቕለበውን። ነቶም ንእኡ ዝፈርሑን ንስሙ ዘኽብሩን ድማ፥ ኣብ ቅድሚኡ መፅሓፍ መዘከርታ ተፃሕፈ።

ናተይ ክኾኑ እዮም፥ ይብል ኣሎ ኣቦ ሰራዊት ሰማይ፥ በታ ኣነ ዝሰርሓ መዓልቲ ፍሉይ ገንዘበይ ክኾኑ እዮም። ከምቲ ኣቦ ነቲ ዘገልግሎ ወዱ ዝንሕፈሉ፥ ኣነ ድማ ክንሕፎም እየ። ከም ብሓድሽ ኣብ መንጎ ፃድቕን ሓጢኣተኛን፥ ኣብ መንጎ እቲ ንኣቦና ዘገልግልን እቲ ዘየገልግሎን ዘሎ ፍልልይ ክትርእዩ ኢኹም።