Malaki 3

3 ¹Wò ó, èmi ń rán ìránṣẹ́ mi, òun yóò sì tún ọ̀nà ṣe níwájú mi. Nígbà náà, lójijì, Olúwa tí ẹ̀yin ń wá yóò wá sí tẹ́mpìlì rẹ̀—Jesu, ìránṣẹ́ májẹ̀mú náà, ẹni tí inú yín dùn sí. Wò ó, ó ń bọ̀, ni Baba àwọn ọmọ ogun ọ̀run wí. ^a a v1 Ìránṣẹ́ tí ó tún ọ̀nà ṣe ni Johanu Onítẹ̀bọmi, Olúwa tí ó sì wá sí tẹ́mpìlì rẹ̀ ni Jesu—ìránṣẹ́ májẹ̀mú náà. Marku fi ọ̀rọ̀ wọ̀nyí gan-an bẹ̀rẹ̀ Ìhìnrere rẹ̀ (Marku 1:2). ²“Ṣùgbọ́n ta ni ó lè faradà ọjọ́ tí ó bá dé? Ta ni ó lè dúró nígbà tí ó bá farahàn? Ó dàbí iná ẹni tí ń yọ́ irin mọ́, bí ọṣẹ olùfọṣọ. ³Yóò jókòó láti yọ́ àti láti sọ fàdákà di mímọ́; yóò sọ àwọn ọmọ Lefi di mímọ́, yóò sì yọ́ wọn mọ́ bí wúrà àti fàdákà, wọn yóò sì mú ọrẹ wá fún Baba wa ní òdodo. ⁴Nígbà náà ni ọrẹ Juda àti Jerusalemu yóò wu Baba wa, bí ti ọjọ́ àtijọ́, bí ti àwọn ọdún ìgbà àtijọ́.”

⁵Èmi yóò súnmọ́ yín láti ṣe ìdájọ́ yín, ẹlẹ́rìí tí ó yára sí àwọn aláfọ̀ṣẹ, àwọn panṣágà, àwọn tí ń búra èké, àwọn tí ń rẹ́ òṣìṣẹ́ jẹ níbi owó iṣẹ́ rẹ̀, tí ń ni opó àti ọmọ òrukàn lára, tí ń ti àlejò sẹ́gbẹ̀ẹ́ kan, tí wọn kò sì bẹ̀rù mi, ni Baba àwọn ọmọ ogun ọ̀run wí.

Ẹ Padà Sọ́dọ̀ Baba Yín

⁶Nítorí èmi, Baba yín, kì í yípadà; nítorí náà ẹ̀yin, àwọn ọmọ Jakọbu, ni a kò pa run.

⁷Láti ọjọ́ àwọn baba ńlá yín wá, ẹ̀yin ti yà kúrò nínú àwọn òfin mi, ẹ kò sì pa wọ́n mọ́. Ẹ padà sọ́dọ̀ mi, èmi yóò sì padà sọ́dọ̀ yín, ni Baba àwọn ọmọ ogun ọ̀run wí. Ṣùgbọ́n ẹ̀yin béèrè pé, ‘Báwo ni àwa yóò ṣe padà?’

⁸Ènìyàn ha lè jà Baba rẹ̀ lólè bí? Síbẹ̀ ẹ̀yin ń jà mí lólè. Ṣùgbọ́n ẹ̀yin béèrè pé, ‘Báwo ni àwa ṣe jà ọ́ lólè?’ Nínú ìdámẹ́wàá àti àwọn ọrẹ. ⁹A fi ègún bú yín, nítorí tí ẹ̀yin ń jà mí lólè—gbogbo orílẹ̀-èdè yín pátá. ¹⁰Ẹ mú gbogbo ìdámẹ́wàá wá sínú ilé ìṣúra, kí oúnjẹ lè wà nínú ilé mi. Ẹ dán mi wò nínú èyí, ni Baba àwọn ọmọ ogun ọ̀run wí, kí ẹ sì wò ó bóyá èmi kì yóò ṣí àwọn fèrèsé ọ̀run sílẹ̀ fún yín, kí n sì tú ìbùkún jáde fún yín títí tí àìní kì yóò fi sí mọ́. ¹¹Èmi yóò bá apanirun wí fún yín, kí ó má bàa pa èso ilẹ̀ yín run, àjàrà yín ní oko kì yóò sì kùnà láti so èso, ni Baba àwọn ọmọ ogun ọ̀run wí. ¹²Nígbà náà ni gbogbo orílẹ̀-èdè yóò pè yín ní alábùkún, nítorí ẹ̀yin yóò jẹ́ ilẹ̀ tí ń mú inú dùn, ni Baba àwọn ọmọ ogun ọ̀run wí.

¹³Ọ̀rọ̀ yín le koko sí mi, ni Baba wa wí. Ṣùgbọ́n ẹ̀yin béèrè pé, ‘Kí ni àwa ti sọ sí ọ?’

¹⁴Ẹ̀yin wí pé, ‘Sísin Ọlọ́run jẹ́ asán. Kí ni àwa jèrè nípa pípa àṣẹ rẹ̀ mọ́ àti nípa rírìn bí olùṣọ̀fọ̀ níwájú Baba àwọn ọmọ ogun ọ̀run?’ ¹⁵Nísinsìnyí àwa ń pe àwọn agbéraga ní alábùkún. Àwọn tí ń ṣe búburú ń gbilẹ̀; wọ́n tilẹ̀ ń dán Ọlọ́run wò, wọ́n sì ń bọ́.

¹⁶Nígbà náà ni àwọn tí ó bẹ̀rù Baba wa bára wọn sọ̀rọ̀, òun sì fetísílẹ̀, ó sì gbọ́. A sì kọ ìwé ìrántí níwájú rẹ̀ fún àwọn tí ó bẹ̀rù rẹ̀, tí wọ́n sì ka orúkọ rẹ̀ sí iyebíye.

¹⁷Wọn yóò jẹ́ tèmi, ni Baba àwọn ọmọ ogun ọ̀run wí, ní ọjọ́ tí èmi yóò gbé ìgbésẹ̀, ohun ìní iyebíye mi. Èmi yóò dá wọn sí bí baba ti ń dá ọmọ rẹ̀ tí ń sìn ín sí. ¹⁸Lẹ́ẹ̀kan sí i, ẹ̀yin yóò rí ìyàtọ̀ láàrín olódodo àti ènìyàn búburú, láàrín ẹni tí ń sin Baba wa àti ẹni tí kò sìn ín.