ሚልክያስ 2

2 ¹አሁንም ካህናት ሆይ፤ ይህ ትእዛዝ ለእናንተ ነው።

²ባትሰሙ፣ ወይም ስሜን ለማክበር በልባችሁ ባታኖሩት፣ ይላል የሰማይ ሠራዊት አባት፤ እርግማንን እሰድድባችኋለሁ፤ በረከታችሁንም እረግማለሁ። በልባችሁ ስለማታኖሩት፣ አስቀድሜ ረግሜአቸዋለሁ። ³ዘራችሁን እገሥጻለሁ፤ በፊታችሁም ላይ እበትን እለቀልቃለሁ፤ የበዓላችሁን እበት፤ ከእርሱም ጋር ትወሰዳላችሁ። ⁴ያን ጊዜ ይህን ትእዛዝ ለእናንተ የላክሁት፣ ከሌዊ ጋር ያለኝ ኪዳን ጸንቶ እንዲኖር እንደ ሆነ ታውቃላችሁ፤ ይላል የሰማይ ሠራዊት አባት። ⁵“ከእርሱ ጋር የነበረኝ ኪዳን የሕይወትና የሰላም ነበር፤ በአክብሮት ይጠብቀው ዘንድ ሰጠሁት፤ እርሱም አከበረኝ፤ በስሜም ፊት ተንቀጠቀጠ። ⁶እውነተኛ ትምህርት በአፉ ነበረ፤ በከንፈሮቹም ላይ በደል አልተገኘም። በሰላምና በቅንነት ከእኔ ጋር ተመላለሰ፤ ብዙዎችንም ከኀጢአት መለሰ። ⁷የካህን ከንፈሮች ዕውቀትን ይጠብቃሉ፤ ሰዎችም ከአፉ ትምህርትን ይሻሉ፤ እርሱ የሰማይ ሠራዊት አባት መልእክተኛ ነውና። ⁸እናንተ ግን ከመንገድ ፈቀቅ አላችሁ፤ በትምህርታችሁም ብዙዎችን አሰናከላችሁ፤ የሌዊን ኪዳን አበላሻችሁ፤ ይላል የሰማይ ሠራዊት አባት። ⁹ስለዚህ እኔ ደግሞ በሕዝቡ ሁሉ ፊት የተናቃችሁና የተዋረዳችሁ አደረግኋችሁ፤ መንገዴን ስላልጠበቃችሁ፣ በትምህርታችሁም አድልዎ ስላሳያችሁ ነው።”

እርስ በርስና ለአብ ታማኝ አለመሆን

¹⁰ሁላችን አንድ አባት የለንምን? አንድ አባትስ አልፈጠረንምን? ታዲያ የአባቶቻችንን ኪዳን በማርከስ፣ እርስ በርሳችን ለምን እንከዳዳለን? ¹¹ይሁዳ አታላይ ሆኖአል፤ በእስራኤልና በኢየሩሳሌም ጸያፍ ነገር ተፈጽሞአል። ይሁዳ አባታችን የሚወደውን ቅዱስ ስፍራ አርክሶአል፤ የባዕድ አምላክንም ሴት ልጅ አግብቶአል። ¹²ይህን የሚያደርገውን ሰው፣ ማንም ይሁን ማን፣ ለሰማይ ሠራዊት አባት መባ የሚያቀርብም ቢሆን፣ አባታችን ከያዕቆብ ድንኳኖች ይቍረጠው።

¹³ሁለተኛም የምታደርጉት ይህ ነው፦ መባውን ከእንግዲህ ስለማይመለከት፣ ከእጃችሁም በደስታ ስለማይቀበለው፣ የአባታችንን መሠዊያ በእንባ፣ በልቅሶና በዋይታ ትሸፍናላችሁ። ¹⁴እናንተም፣ “ስለ ምን?” ትላላችሁ። ይህም አባታችን በአንተና በጕብዝናህ ሚስት መካከል ምስክር ሆኖ ስለ ነበረ ነው፤ እርሷ ባልንጀራህና በኪዳን ሚስትህ ሆና ሳለች፣ ከዳሃት። ¹⁵አብ ከሚስትህ ጋር አንድ አላደረገህምን? በሥጋም በመንፈስም የእርሱ ናችሁ። ታዲያ ምን ይፈልጋል? ከጋብቻችሁ እግዚአብሔርን የሚፈሩ ልጆችን ነው። ስለዚህ መንፈሳችሁን ጠብቁ፤ ማንም የጕብዝናውን ሚስት አይክዳ።

¹⁶“ፍቺን እጠላለሁና” ይላል የእስራኤል አባት የሆነው አባታችን፤ “ልብሱንም በግፍ የሚሸፍነውን እጠላለሁ” ይላል የሰማይ ሠራዊት አባት። ስለዚህ መንፈሳችሁን ጠብቁ፤ ታማኝ አለመሆንን ተዉ።

¹⁷በቃላችሁ አባታችንን አድክማችኋል። እናንተ ግን፣ “በምን አደከምነው?” ትላላችሁ። “ክፉ የሚያደርጉ ሁሉ በፊቱ መልካም ናቸው፤ በእነርሱም ደስ ይለዋል” በማለታችሁ፤ ወይም፣ “የፍትሕ አባት ወዴት አለ?” በማለታችሁ ነው።