Uba Ya Tsawata wa Firistocinsa

An yi wa firistoci magana kai tsaye da tsanani: koyarwarsu ta sa mutane tuntuɓe, saboda haka an janye girmansu. Sa'an nan irin wannan cin amana a gida: ashe, ba Uba ɗaya ne gare mu duka ba? Ubanmu ya shaida alkawarin aure, yana kuma ƙin raba shi.

Babi na 2.

To yanzu, ku firistoci, wannan umarni dominku ne.

Idan ba za ku saurara ba, ko ku kula a zuciyarku domin ku girmama sunana, in ji Uba Mai Rundunonin Sama, zan aiko muku da la'ana, in kuma la'anta albarkunku. Na riga na la'anta su, domin ba kwa kulawa a zuciyarku. Zan tsawata wa zuriyarku, in shafa muku taki a fuskokinku—takin bukukkuwanku—a kuma ɗauke ku tare da shi. Sa'an nan za ku sani na aiko muku da wannan umarni, domin alkawarina da Lawi yă tabbata, in ji Uba Mai Rundunonin Sama. “Alkawarina da shi, rai da salama ne; na ba shi su domin su kasance da bangirma, shi kuwa ya girmama ni, ya yi rawar jiki a gaban sunana. Tabbatacciyar koyarwa tana a bakinsa, babu kuskure a leɓunansa. Ya yi tafiya tare da ni cikin salama da adalci, ya kuma juyar da mutane da yawa daga zunubi. Leɓunan firist suna kiyaye sani, mutane kuwa suna neman koyarwa daga bakinsa, gama shi manzon Uba Mai Rundunonin Sama ne. Amma ku kun kauce daga hanya, kun kuma sa mutane da yawa suka yi tuntuɓe ta wurin koyarwarku; kun ɓata alkawarin Lawi, in ji Uba Mai Rundunonin Sama. Saboda haka na mai da ku abin reni da ƙasƙantattu a gaban dukan jama'a, domin ba ku kiyaye hanyoyina ba, sai dai kun nuna bambanci a cikin koyarwarku.”

Rashin Aminci ga Juna da kuma ga Uba

Ashe, ba dukanmu muna da Uba ɗaya ba? Ashe, ba Uba ɗaya ne ya halicce mu ba? Don me muke ci wa juna amana, muna ƙazantar da alkawarin kakanninmu? Yahuda ya ci amana; an aikata abin ƙyama a cikin Isra'ila da Urushalima. Yahuda ya ƙazantar da wuri mai tsarki na Ubanmu, wanda yake ƙauna, ya kuma auri 'yar wani baƙon alla. Bari Ubanmu yă datse daga tentunan Yaƙubu mutumin da yake yin wannan—kowa ne ya kasance—ko da mai kawo hadaya ga Uba Mai Rundunonin Sama ne.

Ga kuma wani abu na biyu da kuke yi, kuna rufe bagaden Ubanmu da hawaye, kuna kuka da nishi, domin bai ƙara kula da hadaya ba, ko yă karɓe ta da farin ciki daga hannunku. Kuna tambaya, “Don me?” Domin Ubanmu ya shaida tsakaninka da matar ƙuruciyarka, wadda ka ci amanarta—ko da yake abokiyar zamanka ce, matarka ta alkawari. Ashe, ba Uba ne ya mai da kai ɗaya da matarka ba? Jiki da ruhu, ku nasa ne. To, me yake so? 'Ya'ya masu tsoron Allah daga haɗuwarku. Saboda haka ka kiyaye ruhunka; kada kowa yă ci amanar matar ƙuruciyarsa.

“Gama ina ƙin saki,” in ji Ubanmu, Uban Isra'ila, “da kuma duk wanda ya rufe tufafinsa da tashin hankali,” in ji Uba Mai Rundunonin Sama. Saboda haka ka kiyaye ruhunka; kada ka ci amana.

Kun gajiyar da Ubanmu da maganganunku. Duk da haka kuna tambaya, “Yaya muka gajiyar da shi?” Ta wurin cewa, “Dukan masu aikata mugunta masu kyau ne a gabansa, yana kuma farin ciki da su”—ko kuwa, “Ina Uban adalci?”