Malaki 2

2 ¹Sasa, enyi makuhani, amri hii ni kwa ajili yenu.

²Kama hamtasikiliza, wala kutia moyoni kulitukuza jina langu, asema Baba wa majeshi ya mbinguni, nitawapelekea laana, nami nitazilaani baraka zenu. Naam, nimekwisha kuzilaani, kwa sababu hamkutia moyoni. ³Nitawakemea wazao wenu, nami nitawapaka mavi usoni mwenu—mavi ya sikukuu zenu—nanyi mtaondolewa pamoja nayo. ⁴Ndipo mtakapojua ya kuwa nimewapelekea amri hii, ili agano langu na Lawi lidumu, asema Baba wa majeshi ya mbinguni. ⁵"Agano langu naye lilikuwa la uzima na amani; nikampa hivyo ili avishike kwa heshima, naye akaniheshimu na kutetemeka mbele ya jina langu. ⁶Mafundisho ya kweli yalikuwa kinywani mwake, wala hapakuwa na uovu midomoni mwake. Alikwenda pamoja nami kwa amani na unyofu, akawageuza wengi kutoka katika dhambi. ⁷Midomo ya kuhani hutunza maarifa, nao watu hutafuta mafundisho kinywani mwake, kwa maana yeye ni mjumbe wa Baba wa majeshi ya mbinguni. ⁸Lakini ninyi mmeiacha njia, mkawakwaza wengi kwa mafundisho yenu; mmeliharibu agano la Lawi, asema Baba wa majeshi ya mbinguni. ⁹Kwa hiyo nami nimewafanya kudharauliwa na kuwa duni mbele ya watu wote, kwa sababu hamkuzishika njia zangu, bali mmekuwa na upendeleo katika mafundisho yenu."

Wasio Waaminifu Wao kwa Wao na kwa Baba

¹⁰Je, sote hatuna Baba mmoja? Je, si Baba mmoja aliyetuumba? Mbona basi twasalitiana, tukilinajisi agano la baba zetu? ¹¹Yuda si mwaminifu; jambo la machukizo limetendeka katika Israeli na Yerusalemu. Yuda amepanajisi mahali patakatifu pa Baba yetu, ambapo yeye hupapenda, naye ameoa binti wa mungu mgeni. ¹²Baba yetu na amkatilie mbali katika hema za Yakobo mtu atendaye jambo hili—yeyote awaye yote—hata yule aletaye sadaka kwa Baba wa majeshi ya mbinguni.

¹³Tena kuna jambo la pili mnalolitenda: mnaifunika madhabahu ya Baba yetu kwa machozi, kwa kulia na kuugua, kwa sababu haitazami tena sadaka, wala kuikubali kwa furaha kutoka mkononi mwenu. ¹⁴Nanyi mwauliza, "Kwa nini?" Kwa sababu Baba yetu alikuwa shahidi kati yako na mke wa ujana wako, uliyemsaliti—ingawa ni mwenzako, naye ni mke wako kwa agano. ¹⁵Je, Baba hakukufanya mmoja pamoja na mke wako? Kwa mwili na roho, ninyi ni wake. Naye ataka nini? Watoto wamchao Mungu katika muungano wenu. Basi ilindeni roho zenu; asiwepo mtu amsalitiye mke wa ujana wake.

¹⁶"Kwa maana nachukia talaka," asema Baba yetu, Baba wa Israeli, "na yeye aifunikaye nguo yake kwa jeuri," asema Baba wa majeshi ya mbinguni. Basi ilindeni roho zenu; msiwe wasio waaminifu.

¹⁷Mmemchosha Baba yetu kwa maneno yenu. Lakini mwauliza, "Tumemchosha kwa namna gani?" Kwa kusema, 'Kila atendaye maovu ni mwema machoni pake, naye hupendezwa nao'—au, 'Yuko wapi Baba wa haki?'