Bouei Haoeibü Ungshedbou Shuong to Hakda
Ungshedbou shuong to huphangan hoba kaangko joyoda—haoeneibü lenbüei mütshuong phaiyettikei, khoei soumo apyokei. Kheijinei chem ka jet mailem: sen pendou la Bou che aki lo? Seneibü Bou yaksa lebü ngühlang hangangbü kikei, hoba kho tebangentibü to haanda.
2 1Tou, ungshedbou shuong, hibü ngühkhüm kan shangabü ki.
2Kanei ngüh adit, ayingsi ngeibü nyen soumo hatla kaneibü maanga apholonga, dogo lakjaibü dan Bouei lauda, ngei kan thükto shedsikhau hautilabü hoba kaneibü haülabü to khükla uoklabü. Ngei haoen tegü khükla uoka, aishanga kanei maanga apho. 3Ngei kaneibü lilabü to haklabü hoba kaneibü thenyek ka khü, kaneibü lem shuongeibü khü, naanglepan apyolabü, hoba kanei kho yoa satan apyolabü. 4Kheijinei ngei kan la hibü ngühkhüm hautikei dogo kanei ngelabü, khei Levi yoa ngeibü theyolanyobü kho loula shanga, dogo lakjaibü dan Bouei lauda. 5“Hao yoa ngeibü theyolanyobü kho langkei hoba sangmai kikei; ngei haoen hao la kukei, hao haüthükla shanga, hoba haoei ngo to soumo hatkei hoba ngeibü nyen thedanga lühkei. 6Maimaitham ngühkhüm haoeibü sembunga kikei, hoba haoeibü sembung khop ka asaopobü akitei. Haoei ngo yoa sangmai hoba tükdebüei paikei, hoba juongbü to shabü ka sepeikei. 7Ungshedboueibü sembungei hapbüngebü jungeida, hoba müt shuongei haoeibü sembung ka ngühkhüm lamda, aishanga haoei lakjaibü dan Boueibü hangangbü ki. 8Lausikei kanei lam ka bangjung satkei hoba kaneibü ngühkhümei juongbü to phaiyettikei; kanei Levi theyolanyobü amaiko kümbei, dogo lakjaibü dan Bouei lauda. 9Khoei ngei kan la müt pendou thedanga aweasüngbü hoba yantibü kümkei, aishanga kanei ngeibü lamnyu ajungei lausikei kaneibü ngühkhüma the chühkei.”
Che to Che Hoba Bou to Mailem Akibü
10Sen pendoueibü Bou che aki lo? Bou cheei sen pakentia aying lo? Aila sen cheei che to khümbo kuan apda, seneibü pisiboueibü theyolanyobü shatiko? 11Jihuda mailem akitei; Israel hoba Jerusalema mangsenlabü che kümbo kuan apa. Jihudaei Boueibü sanoubü saopobü kishang kho shatikei, hoba küksithang mühghaü nouyangnyu lekei. 12Bouei hibü kümbü müt—aoei ongkei—to Jakob neichem ka wapan apbushi, lakjaibü dan Bou to lembü kubou to limbo.
13Hoba nyiboubü peisilei kanei kümda ho: kanei Boueibü lembü kushang haapbo hoba wiyoko, nyeksi yoa naangkei, aishanga haoei kaneibü lembü to touje amaangshik, ayingsi kaneibü ik ka maangnyu angko asunglet. 14Nyi phekei, “Aila?” Aishanga Bouei no si nyi nashoudang yak kanglanga aukabü yeikei, aoei to nyi maangpokkei, hao nyi jenabou kisikei, theyolanyobü danko nyi yak kibü. 15Bouei no hoba nyi yak to che aküm lo? Mang hoba soushou, no haoeibü ki. Hoba haoei ai kümmangsühda? Nyi yoa bakbü Mühghaü shousi shuong. Hibü nyi soushou chühlepashi; aoei ongkei haoeibü nashoudang yak to amaangpokjan.
16“Aishanga ngei bangbü mangsenda,” dogo seneibü Bou, Israeleibü Bouei lauda, “hoba aoei haoeibü nei to ik shatyobüei naangkei,” dogo lakjaibü dan Bouei lauda. Hibü nyi soushou chühlepashi; amaangpokjan.
17Kanei kaneibü ngühei seneibü Bou semthetkei. Khei yingasikei kanei phekei, “Künei hao lanei semthetkei?” Kanei lauko, “Amaibü kümbü pendou kho haoeibü thedanga maibü ki, hoba haoei haoen to delilaei”—ayingsi, “Matjembü Bou lanei kia?”
