Mukunga wa Mbanza ya Ngolu
Kukwikila mwena Tata wetu, hana, kusiku dyambu dya mbundu kaka, kaasi mbanza ya bibaka yi myelu mifululu. Basingu bazimbula ni kisalu kyawu kyabuta kaka tembu, konda luhulusu kwena mutu. Buna bavingila, bazimbulwa ni babindika mwelu tii yi khabu zisi luta, amana basilu ni bafu ba bawu bakayimbila tuka mu mfututu.
26 1Muna tangwa dina bakayímbila mukunga wawu muna tsi ya Yuteya: Twenina yi mbanza ya ngolu; yandi wisi sya luhulusu hanga bibaka yi mapangu ma ngolu. 2Yafululenu mwelu, hanga yákota nati ya masonga— nati yina yenina yi lukwikilu. 3Ngeyi wisi mukengila mu ngemba yalungila, yandi wuna wáhungudi mabanza mandi kwena ngeyi, mukuma yandi wisi kwikila mwena ngeyi. 4Kwikilenu mwena Tata wetu mu mvula yi mvula, mukuma Tata wetu kenina Tadi dya mvula yi mvula. a a v4 Tadi kenina mosi mu zina za theti za kinkunga mu kutela Tata wetu muna Masonuku. Dyakangama, dikondi nikuka, dyakwikama — yandi kenina fusyangeni yikondi nikuka ha tsi ya luzingu lwosu lwisi kwikila mwena yandi. 5Mukuma yandi wákulula batu bana bazínga mu kuleya, mbanza yina yízangumuki. Wáyikulula, wáyikulula ha tsi, wáyilosa ku fusyangeni. 6Kulu disi yidyatikisa— malu ma batsukami, bitambi bya batu bana benina mu phasi. 7Nzila ya batu ba masonga yísungama; ngeyi wisi séngwadila nzila ya batu ba masonga. 8Muna nzila ya khabu zaku, A Tata wetu, thwisi kuhingila ngeyi; khumbu yaku yi lukumu lwaku, byawu moya wetu wisi zola. 9Muna phipha moya wama wisi kuzola ngeyi; mu kati dyama kitembu kyama kisi kusanda ngeyi yi mbundu yosu. Mukuma tangwa khabu zaku zibwakila ha tsi, batu bana bazínga mu nza balonguka masonga. 10Yuka ni basongila khenda kwena mutu wambi, kasiku longuka masonga; muna tsi ya busonga yandi wisi sala mambi, amana kasiku mona kineni kya Tata wetu. 11A Tata wetu, koku dyaku dizangumuki, kaasi bawu basiku mona dyawu. Bamona kitya kyaku kikuma kya batu baku, amana bakwata tsoni. Mbawu yina yáyidikwa kikuma kya bambeni baku yibazinisa. 12A Tata wetu, ngeyi kawútusyila ngemba betu, mukuma ngeyi kyedika wálungisa bisalu byetu byosu kikuma kya betu. 13A Tata wetu, bapfumu bankaka, konda ngeyi, bayádila ha thandu yetu, kaasi khumbu yaku kaka tuyúbukaka. 14Bawu bafwidi, bakazíngaku; bawu bena bitembu bya bafwidi, bakafútumukaku; mukuma ngeyi wánata kuzangana ha thandu ya bawu, amana wákumuna moyo wa bawu wosu. 15Ngeyi wávudisa nati, A Tata wetu, ngeyi wávudisa nati; ngeyi wákembuswa; wávudisa mahata moosu ma tsi. 16A Tata wetu, mu phasi básanda ngeyi; bafwéta lusambulu lwa kitsweki tangwa tsungika yaku yákala ha thandu ya bawu. 17Hanga mukhetu wuna wákala ku vumu, wuna wisi nyongama amana wisi kalunga mu misongu mya kubuta tangwa kabwesukini mu kubuta, bwabuna twákala ku mesu maku, A Tata wetu. 18Twákala ku vumu, twányongama, kaasi twabuta kaka kitembu. Tusiku nata luhulusu ha tsi, amana batu ba nza basiku butuka. 19Bafwidi baku bázinga; bodi za bawu zikafútumuka. Tokamenu amana yimbilenu mu kyesi, benu bana bisi zinga mu fusyangeni! Mukuma mavutu maku menina mavutu ma mwini wa khyelu, amana tsi yábuta bitembu bya bafwidi. 20Yizenu, batu bama, kotenu mu bizika byenu amana yafikenu mwelu myenu kunima dyenu; swamenu benu-meni mu ntangwa ya khunda tii yi kuna nganzi yilúta.
21Mukuma talenu, Tata wetu kalúbuka mu kifulu kyandi, hanga kaheka ndola kwena batu ba tsi kikuma kya masumu ma bawu, amana tsi yásongila menga mana mátyakana hana thandu yandi, amana yafidingaku hika batu bana báhondiwa mu kati kyandi.
