ሕዝቅኤል 35 FHB Father's Heart Bible™

35 ¹ቃል ኣቦና ናባይ መፀ፦

²ኦ ወዲ ሰብ፥ ገፅካ ናብ እምባ ሴይር ኣቕንዕ፥ ኣንፃሩ ድማ ተነበ። ³ንእኡ ኸምዙይ በሎ፦ ጐይታ ኣቦ ከምዙይ ይብል ኣሎ፦ “እንሆ፥ ኦ እምባ ሴይር፥ ኣንፃርካ እየ። ኢደይ ናባኻ ዘርጊሐ ባድማን ዑናን ክገብረካ እየ። ⁴ንከተማታት ዑና ክገብረን እየ፥ ንስኻ ድማ ባድማ ክትከውን ኢኻ። ሽዑ ኣነ ኣቦ ምዃነይ ክትፈልጥ ኢኻ።

⁵ናይ ጥንቲ ፅልኢ ስለ ዝነበረካ፥ ብመዓልቲ መከራኦም፥ በቲ ናይ መወዳእታ ቕፅዓቶም ዝመፅአሉ ጊዜ ኸዓ ንደቂ እስራኤል ናብ ሰይፊ ኣሕሊፍካ ስለ ዝሃብካዮም፥” ⁶ስለዙይ ኣነ ህያው ከም ዝኾንኩ፥ ይብል ጐይታ ኣቦ፥ ናብ ደም ኣሕሊፈ ክህበካ እየ፥ ደም ድማ ክስዕበካ እዩ። ንደም ስለ ዘይፀላእካ፥ ደም ክስዕበካ እዩ። ⁷“ንእምባ ሴይር ባድማን ዑናን ክገብሮ እየ፤ ነቶም ዝመፁን ዝኸዱን ኵሎም ከዓ ካብኡ ክቘርፆም እየ። ⁸ንእምባታቱ ብቕቱላት ክመልኦ እየ፤ ኣብ ኰረብታታትካን ለሰታትካን ኣብ ኵሉ ሩባታትካን ድማ እቶም ብሰይፊ ዝተቐተሉ ክወድቁ እዮም። ⁹ንዘለኣለም ባድማ ክገብረካ እየ፤ ከተማታት ድማ ሰብ ዘይነብረን ክኾና እየን። ሽዑ ኣነ ኣቦ ምዃነይ ክትፈልጥ ኢኻ።

¹⁰‘እዘን ክልተ ህዝብታት፥ እዘን ክልተ ሃገራት ናተይ ክኾና እየን፤ ክንወርሰን ኢና’ ኢልካ ስለ ዝበልካ፥ ኣቦና ኣብኡ እንዳሃለወ፥” ¹¹ስለዙይ ኣነ ህያው ከም ዝኾንኩ፥ ይብል ጐይታ ኣቦ፥ ከምቲ ንእስራኤል ብምፅላእካ ዘርኣኻዮ ቍጥዓኻን ቅንኣትካን፥ ከምኡ ኽገብረካ እየ፤ ንኣኻ ክፈርደካ እንተለኹ ኸዓ ኣብ ማእኸል ህዝቢ እስራኤል ባዕለይ ክፍለጥ እየ።

¹²ሽዑ ኣነ ኣቦ ምዃነይ ክትፈልጥ ኢኻ። ነቲ ኣብ ልዕሊ እምባታት እስራኤል ዝተዛረብካዮ ዅሉ ፀርፊ ሰሚዐዮ እየ፤ “ባዲሞም እዮም፥ ክንበልዖም ተዋሂቦምና” ኢልካ። ¹³ብኣፍካ ኣብ ልዕለይ ተመካሕካ፤ ቃላትካ ድማ ኣብ ልዕለይ ኣብዛሕካ፤ ኣነ ኸዓ ሰማዕክዎ። ¹⁴ጐይታ ኣቦ ከምዙይ ይብል ኣሎ፦ ብዘላ ምድሪ ክትሕጐስ ከላ፥ ኣነ ባድማ ክገብረካ እየ። ¹⁵ከምቲ ርስቲ ቤት እስራኤል ስለ ዝባደመ ደስ ዝበለካ፥ ከምኡ ኽገብረካ እየ። ኦ እምባ ሴይር፥ ንስኻን ብዘሎ ኤዶምን ባድማ ክትኮኑ ኢኹም። ሽዑ ኣነ ኣቦ ምዃነይ ክፈልጡ እዮም።