Ithe witũ Aatuĩra Edomu Ciira nĩ ũndũ wa Rũmena rwa Tene

Edomu, kũu Kĩrĩma-inĩ gĩa Seiru, yatũũrire na rũmena rwa tene, ĩkĩneana Isiraeli kũrĩ rũhiũ rwa njora mũthenya wa mũtino, ĩgĩcooka ĩkĩĩtĩĩa mabũrũri macio meerĩ matigĩtwo matheri atĩ nĩ mayo. Ithe witũ agacookia atĩ Edomu nĩyo ĩgaatigwo ĩrĩ theri, na nĩ ya gũtũũra.

Gĩcunjĩ 35.

Naguo ũhoro wa Ithe witũ ũgĩnginyĩra, ngĩĩrwo atĩrĩ:

Mũrũ wa mũndũ, erekeria ũthiũ waku harĩ Kĩrĩma gĩa Seiru, ũkĩrathĩre ũhoro wa gũgĩũkĩrĩra, ũkĩĩre atĩrĩ: Mwathani Ithe witũ ekuuga atĩrĩ: “Ta rora, nĩngũgũũkĩrĩra, wee Kĩrĩma gĩa Seiru. Nĩngatambũrũkia guoko gwakwa ngũũkĩrĩre, nguo ngũtue werũ na kũndũ gũkirĩte ihooru. Matũũra maku nĩngamatua mĩanangĩko, nawe ũgaatuĩka kũndũ gũkirĩte ihooru. Hĩndĩ ĩyo nĩũkamenya atĩ nĩ niĩ Ithe witũ.

Tondũ nĩwagĩire na rũmena rwa tene, ũkĩneana andũ a Isiraeli kũrĩ rũhiũ rwa njora hĩndĩ ĩrĩa maakorirwo nĩ mũtino, hĩndĩ ĩrĩa iherithia rĩao rĩa mũthia rĩakinyire,” nĩ ũndũ ũcio, o ta ũrĩa niĩ ndũũraga muoyo, ũguo nĩguo Mwathani Ithe witũ ekuuga, nĩngakũneana harĩ ũiti wa thakame, naguo ũiti wa thakame nĩũgakũingatithia. Kuona atĩ ndwathũũrire ũiti wa thakame, ũiti wa thakame nĩũgakũingatithia. “Nĩngatua Kĩrĩma gĩa Seiru werũ ũkirĩte ihooru, na ndinie kuuma kũu mũndũ o wothe ũtoonyaga na ũkoima. Nĩngaiyũria irĩma ciakĩo andũ arĩa moragĩtwo; natuo tũrĩma twaku, na ituamba, na mĩkuru yaku yothe, arĩa moragĩtwo na rũhiũ rwa njora nĩmakagũa kuo. Nĩngatua ihooru nginya tene; namo matũũra maku matigaacooka gũikaragwo. Hĩndĩ ĩyo nĩũkamenya atĩ nĩ niĩ Ithe witũ.

Tondũ nĩwoigire atĩrĩ, ‘Ndũũrĩrĩ ici cierĩ, na mabũrũri maya meerĩ, magaatuĩka makwa; nĩtũkamatunyana’—o na gũtuĩka Ithe witũ aarĩ kũu,” nĩ ũndũ ũcio, o ta ũrĩa niĩ ndũũraga muoyo, ũguo nĩguo Mwathani Ithe witũ ekuuga, nĩngagwĩka kũringana na marakara maku na ũiru waku, iria wonanirie ũkĩthũũra Isiraeli, na nĩngemenyithania harĩ andũ a Isiraeli rĩrĩa ngaagũtuĩra ciira.

Hĩndĩ ĩyo nĩũkamenya atĩ nĩ niĩ Ithe witũ. Nĩnjiguĩte kũnyararithia guothe kũrĩa wanyararithirie irĩma cia Isiraeli, ũkiuga atĩrĩ, “Nĩcianangĩku, nĩtũheetwo tũcirĩe.” Nĩwenanĩire na kanua gaku ũkĩnjũkĩrĩra, na ũkĩingĩhia ciugo ciaku cia kũnjũkĩrĩra; na niĩ nĩndaiguire. Mwathani Ithe witũ ekuuga atĩrĩ: Hĩndĩ ĩrĩa thĩ yothe ĩgaakena, niĩ nĩngagũtua ihooru. O ta ũrĩa wakenire nĩ ũndũ igai rĩa nyũmba ya Isiraeli rĩaarĩ ihooru, no taguo ngaagwĩka. Nĩũgaatuĩka ihooru, wee Kĩrĩma gĩa Seiru, na Edomu guothe, guothe biũ. Hĩndĩ ĩyo nĩmakamenya atĩ nĩ niĩ Ithe witũ.