Nna anyị Na-ekpe Edọm Ikpe Maka Ịkpọasị Ochie Ya

Edọm, n'Ugwu Sia, jidesiri iro ochie ike, rara Izrel nye mma agha n'ụbọchị ọdachi, wee kwuo na ala abụọ ahụ tọgbọrọ n'efu bụ nke ya. Nna anyị zara na Edọm ga-abụ nke tọgbọrọ n'efu, ruo mgbe ebighị ebi.

Isi 35.

Okwu Nna anyị ruru m, sị:

Nwa nke mmadụ, chee ihu gị megide Ugwu Sia, buokwa amụma megide ya. Gwa ya, sị: Nke a bụ ihe Nna anyị, Onye kachasị elu, na-ekwu: “Lee, ana m emegide gị, Ugwu Sia. Aga m esetipụ aka m megide gị, meekwa gị ihe tọgbọrọ nʼefu na mkpọmkpọ ebe. Aga m eme ka obodo gị niile ghọọ mkpọmkpọ ebe, ị ga-aghọkwa ebe tọgbọrọ nʼefu. Mgbe ahụ, ị ga-amara na mụ onwe m bụ Nna.

Nʼihi na i buru ịkpọasị ochie nʼobi, ma rara ụmụ Izrel nye nʼaka mma agha nʼoge ọdachi ha, nʼoge ntaramahụhụ ikpeazụ ha bịara,” ya mere, dịka m na-adị ndụ, ka Nna anyị, Onye kachasị elu, na-ekwupụta, aga m arara gị nye nʼọbara ọgbụgba, ọbara ọgbụgba ga-achụkwa gị ọsọ. Ebe ị kpọghị ọbara ọgbụgba asị, ọbara ọgbụgba ga-achụ gị ọsọ. “Aga m eme Ugwu Sia ka ọ ghọọ ebe tọgbọrọ nʼefu, bipụkwa site na ya ndị niile na-abata na ndị na-apụ.” Aga m eji ndị e gburu egbu mejuo ugwu ya niile; nʼelu ugwu nta gị, na ndagwurugwu gị, na ọwa mmiri gị niile, ndị mma agha gburu ga-ada. Aga m eme ka ị tọgbọrọ nʼefu ruo mgbe ebighị ebi; obodo gị niile agaghị enwe onye bi nʼime ha. Mgbe ahụ, ị ga-amara na mụ onwe m bụ Nna.

“Nʼihi na i kwuru, sị, ‘Mba abụọ a, ala abụọ a ga-abụ nke m; anyị ga-ewere ha’—ọ bụ ezie na Nna anyị nọ nʼebe ahụ,” ya mere, dịka m na-adị ndụ, ka Nna anyị, Onye kachasị elu, na-ekwupụta, aga m emeso gị dịka iwe gị na anyaụfụ gị kwesịrị, bụ nke i gosipụtara mgbe ị kpọrọ Izrel asị, aga m emekwa ka a mata m nʼetiti ụmụ Izrel mgbe m na-ekpe gị ikpe.

Mgbe ahụ, ị ga-amata na mụ onwe m bụ Nna. Anụla m nkọcha gị niile megide ugwu niile nke Izrel, sị: “Ha tọgbọrọla nʼefu, e nyela anyị ha ka anyị loo ha.” I ji ọnụ gị tuo ọnụ megide m, ma tụkwaba okwu gị megide m; anụrụ m ya. Nke a bụ ihe Nna anyị, Onye kachasị elu, na-ekwu: Mgbe ụwa niile na-aṅụrị ọṅụ, aga m eme ka ị tọgbọrọ nʼefu. Dịka ị ṅụrịrị ọṅụ nʼihi na ihe nketa nke ụlọ Izrel tọgbọrọ nʼefu, otu a ka m ga-eme gị. Ị ga-atọgbọrọ nʼefu, Ugwu Sia, na Edọm niile, ya niile. Mgbe ahụ, ha ga-amata na mụ onwe m bụ Nna.