Esekiẹli 35

35 ¹Ọ̀rọ̀ Baba wa sì tọ̀ mí wá pé:

²Ọmọ ènìyàn, kọ ojú rẹ sí Òkè Seiri, kí o sì sọ àsọtẹ́lẹ̀ lòdì sí i. ³Sọ fún un pé: Báyìí ni Baba Olódùmarè wí: “Wò ó, mo lòdì sí ọ, Òkè Seiri. Èmi yóò na ọwọ́ mi sí ọ, èmi yóò sì sọ ọ́ di ahoro àti ìdahoro. ⁴Èmi yóò sọ àwọn ìlú rẹ di ahoro, ìwọ yóò sì di ìdahoro. Nígbà náà ni ìwọ yóò mọ̀ pé Èmi ni Baba.

⁵Nítorí tí ìwọ ni ìkórìíra àtijọ́, tí ìwọ sì fi àwọn ọmọ Israẹli lé idà lọ́wọ́ ní àkókò ìdààmú wọn, ní àkókò tí ìjìyà ìkẹyìn wọn dé,” ⁶nítorí náà bí mo ti wà láàyè, ni Baba Olódùmarè wí, èmi yóò fi ọ́ lé ìtàjẹ̀sílẹ̀ lọ́wọ́, ìtàjẹ̀sílẹ̀ yóò sì lépa rẹ. Níwọ̀n bí ìwọ kò ti kórìíra ìtàjẹ̀sílẹ̀, ìtàjẹ̀sílẹ̀ yóò lépa rẹ. ⁷“Èmi yóò sọ Òkè Seiri di ahoro ìdahoro, èmi yóò sì ké kúrò nínú rẹ̀ gbogbo àwọn tí ń wá tí wọ́n sì ń lọ. ⁸Èmi yóò fi àwọn tí a pa kún àwọn òkè rẹ̀; lórí àwọn òkè kéékèké rẹ, àwọn àfonífojì, àti gbogbo àwọn gẹ̀rẹ́gẹ̀rẹ́ rẹ, àwọn tí a fi idà pa yóò ṣubú. ⁹Èmi yóò sọ ọ́ di ahoro títí láé; àwọn ìlú rẹ kì yóò sì ní olùgbé. Nígbà náà ni ìwọ yóò mọ̀ pé Èmi ni Baba.

¹⁰Nítorí tí ìwọ wí pé, ‘Orílẹ̀-èdè méjì wọ̀nyí, ilẹ̀ méjì wọ̀nyí yóò jẹ́ tèmi; àwa yóò sì gbà wọ́n’—bí ó tilẹ̀ jẹ́ pé Baba wa wà níbẹ̀,” ¹¹nítorí náà, bí mo ti wà láàyè, ni Baba Olódùmarè wí, èmi yóò hùwà sí ọ gẹ́gẹ́ bí ìbínú àti ìlara rẹ ṣe tọ́ sí, tí ìwọ fi hàn nínú kíkórìíra Israẹli, èmi yóò sì fi ara mi hàn láàrin àwọn ọmọ Israẹli nígbà tí mo bá ṣe ìdájọ́ rẹ.

¹²Nígbà náà ni ìwọ yóò mọ̀ pé Èmi ni Baba. Mo ti gbọ́ gbogbo ẹ̀gàn rẹ sí àwọn òkè Israẹli pé: “Wọ́n ti dahoro, a fi wọ́n fún wa láti jẹ run.” ¹³Ìwọ fi ẹnu rẹ gbéraga sí mi, ìwọ sì kó àwọn ọ̀rọ̀ rẹ jọ sí mi; mo sì gbọ́ ọ. ¹⁴Báyìí ni Baba Olódùmarè wí: Nígbà tí gbogbo ayé bá ń yọ̀, èmi yóò sọ ọ́ di ahoro. ¹⁵Bí ìwọ ti yọ̀ nítorí tí ogún ilé Israẹli dahoro, bẹ́ẹ̀ ni èmi yóò ṣe sí ọ. Ìwọ yóò di ahoro, Òkè Seiri, gbogbo Edomu, gbogbo rẹ̀. Nígbà náà ni wọn yóò mọ̀ pé Èmi ni Baba.