Ezekieli 35

35 ¹Neno la Baba yetu likanijia:

²Mwanadamu, elekeza uso wako juu ya mlima Seiri, ukatabiri juu yake. ³Uuambie: Baba Mwenyezi asema hivi: "Tazama, mimi ni kinyume nawe, Ee mlima Seiri. Nitanyoosha mkono wangu dhidi yako na kukufanya kuwa ukiwa na uharibifu. ⁴Nitaifanya miji yako kuwa magofu, nawe utakuwa ukiwa. Ndipo utakapojua ya kuwa mimi ni Baba.

⁵Kwa sababu umekuwa na chuki ya kale, nawe uliwatia wana wa Israeli katika nguvu za upanga wakati wa msiba wao, wakati adhabu yao ya mwisho ilipowajia," ⁶kwa hiyo kama niishivyo, asema Baba Mwenyezi, nitakutia katika damu, na damu itakufuatia. Kwa kuwa hukuchukia kumwaga damu, damu itakufuatia. ⁷"Nitaufanya mlima Seiri kuwa ukiwa na uharibifu, nami nitakatilia mbali watu wote wanaokwenda na kurudi. ⁸Nitaijaza milima yake kwa waliouawa; juu ya vilima vyako, mabonde yako, na mifereji yako yote, watu waliouawa kwa upanga wataanguka. ⁹Nitakufanya ukiwa milele; miji yako haitakaliwa na watu. Ndipo utakapojua ya kuwa mimi ni Baba.

¹⁰Kwa sababu umesema, 'Mataifa haya mawili, nchi hizi mbili zitakuwa zangu; nasi tutazimiliki'—ingawa Baba yetu alikuwako," ¹¹kwa hiyo, kama niishivyo, asema Baba Mwenyezi, nitakutenda sawasawa na hasira yako na wivu wako, ulioonyesha katika kuwachukia Israeli, nami nitajidhihirisha miongoni mwa watu wa Israeli nitakapokuhukumu.

¹²Ndipo utakapojua ya kuwa mimi ni Baba. Nimeyasikia matukano yako yote uliyoyanena juu ya milima ya Israeli, ukisema: "Imekuwa ukiwa, tumepewa sisi tuile." ¹³Umejivuna juu yangu kwa kinywa chako, nawe umezidisha maneno yako juu yangu; nami nimeyasikia. ¹⁴Baba Mwenyezi asema hivi: Wakati dunia yote inaposhangilia, nitakufanya ukiwa. ¹⁵Kama ulivyoshangilia kwa sababu urithi wa nyumba ya Israeli ulikuwa ukiwa, ndivyo nitakavyokutenda. Utakuwa ukiwa, Ee mlima Seiri, na Edomu yote, yote pia. Ndipo watakapojua ya kuwa mimi ni Baba.