ପିତା ଇଦୋମର ପ୍ରାଚୀନ ଘୃଣାର ବିଚାର କରନ୍ତି

ସେୟୀର ପର୍ବତରେ ଥିବା ଇଦୋମ ଏକ ପୁରାତନ ଘୃଣା ପୋଷି ରଖିଥିଲା। ବିପଦ ଦିନରେ ସେ ଇସ୍ରାଏଲକୁ ଖଡ଼୍ଗର ହାତରେ ସମର୍ପଣ କଲା, ତାʼପରେ ଖାଲି ହୋଇଥିବା ଦୁଇ ଦେଶକୁ ନିଜର ବୋଲି ଦାବି କଲା। ଆମର ପିତା ଉତ୍ତର ଦିଅନ୍ତି ଯେ ଇଦୋମ ହିଁ ଶୂନ୍ୟ ହେବ, ଏବଂ ଚିରକାଳ ପାଇଁ।

ଅଧ୍ୟାୟ 35।

ପିତାଙ୍କ ବାକ୍ୟ ମୋʼ ନିକଟରେ ଉପସ୍ଥିତ ହେଲା,

ହେ ମନୁଷ୍ୟପୁତ୍ର, ସେୟୀର ପର୍ବତ ବିରୁଦ୍ଧରେ ଆପଣା ମୁଖ ରଖି ତାହା ବିରୁଦ୍ଧରେ ଭବିଷ୍ୟଦ୍‍ବାକ୍ୟ ପ୍ରଚାର କର। ତାହାକୁ କୁହ, ସାର୍ବଭୌମ ପିତା ଏହି କଥା କହନ୍ତି, “ଦେଖ, ହେ ସେୟୀର ପର୍ବତ, ଆମ୍ଭେ ତୁମ୍ଭର ବିପକ୍ଷ ଅଟୁ। ଆମ୍ଭେ ତୁମ୍ଭ ବିରୁଦ୍ଧରେ ଆପଣା ହସ୍ତ ବିସ୍ତାର କରି ତୁମ୍ଭକୁ ଧ୍ଵଂସସ୍ଥାନ ଓ ଉତ୍ସନ୍ନ କରିବା। ଆମ୍ଭେ ତୁମ୍ଭର ନଗରସମୂହକୁ ଉଜାଡ଼ କରିବା, ଆଉ ତୁମ୍ଭେ ଧ୍ଵଂସସ୍ଥାନ ହେବ। ସେତେବେଳେ ତୁମ୍ଭେ ଜାଣିବ ଯେ ଆମ୍ଭେ ପିତା ଅଟୁ।

ଯେହେତୁ ତୁମ୍ଭେ ପ୍ରାଚୀନ ଘୃଣା ପୋଷଣ କଲ, ପୁଣି ଇସ୍ରାଏଲ ସନ୍ତାନଗଣର ବିପଦ ସମୟରେ, ସେମାନଙ୍କ ଅନ୍ତିମ ଦଣ୍ଡ ଉପସ୍ଥିତ ହେବା ସମୟରେ ସେମାନଙ୍କୁ ଖଡ୍ଗର ହସ୍ତରେ ସମର୍ପଣ କଲ,” ଏଥିପାଇଁ ସାର୍ବଭୌମ ପିତା କହନ୍ତି, ଆମ୍ଭର ଜୀବନର ଶପଥ, ଆମ୍ଭେ ତୁମ୍ଭକୁ ରକ୍ତପାତର ହସ୍ତରେ ସମର୍ପଣ କରିବା, ଆଉ ରକ୍ତପାତ ତୁମ୍ଭର ପଛେ ପଛେ ଗୋଡ଼ାଇବ। ତୁମ୍ଭେ ରକ୍ତପାତକୁ ଘୃଣା କଲ ନାହିଁ, ଏଣୁ ରକ୍ତପାତ ତୁମ୍ଭର ପଛେ ପଛେ ଗୋଡ଼ାଇବ। “ଆମ୍ଭେ ସେୟୀର ପର୍ବତକୁ ଧ୍ଵଂସସ୍ଥାନ ଓ ଉତ୍ସନ୍ନ କରିବା, ଆଉ ତହିଁରୁ ଯାତାୟାତକାରୀ ସମସ୍ତଙ୍କୁ ଉଚ୍ଛିନ୍ନ କରିବା। ଆମ୍ଭେ ତାହାର ପର୍ବତସମୂହକୁ ହତ ଲୋକରେ ପରିପୂର୍ଣ୍ଣ କରିବା; ତୁମ୍ଭର ଉପପର୍ବତ, ଉପତ୍ୟକା ଓ ସମସ୍ତ ନଦୀନାଳାରେ ଖଡ୍ଗରେ ହତ ଲୋକମାନେ ପତିତ ହେବେ। ଆମ୍ଭେ ତୁମ୍ଭକୁ ଅନନ୍ତକାଳ ନିମନ୍ତେ ଧ୍ଵଂସସ୍ଥାନ କରିବା; ତୁମ୍ଭର ନଗରସମୂହ ଅଧିବାସୀଶୂନ୍ୟ ରହିବ। ସେତେବେଳେ ତୁମ୍ଭେ ଜାଣିବ ଯେ ଆମ୍ଭେ ପିତା ଅଟୁ।

ଯେହେତୁ ତୁମ୍ଭେ କହିଲ, ‘ଏହି ଦୁଇ ଗୋଷ୍ଠୀ, ଏହି ଦୁଇ ଦେଶ ଆମ୍ଭର ହେବ; ଆମ୍ଭେମାନେ ତାହା ଅଧିକାର କରିବୁ’—ଯଦ୍ୟପି ଆମ୍ଭମାନଙ୍କ ପିତା ସେଠାରେ ଥିଲେ,” ଏଥିପାଇଁ ସାର୍ବଭୌମ ପିତା କହନ୍ତି, ଆମ୍ଭର ଜୀବନର ଶପଥ, ତୁମ୍ଭେ ଇସ୍ରାଏଲକୁ ଘୃଣା କରିବାରେ ଯେଉଁ କ୍ରୋଧ ଓ ଈର୍ଷା ଦେଖାଇଲ, ତଦନୁସାରେ ଆମ୍ଭେ ତୁମ୍ଭ ପ୍ରତି ବ୍ୟବହାର କରିବା, ଆଉ ଯେତେବେଳେ ଆମ୍ଭେ ତୁମ୍ଭର ବିଚାର କରିବା, ସେତେବେଳେ ଇସ୍ରାଏଲ ଲୋକଙ୍କ ମଧ୍ୟରେ ଆପଣାକୁ ପରିଚିତ କରାଇବା।

ସେତେବେଳେ ତୁମ୍ଭେ ଜାଣିବ ଯେ ଆମ୍ଭେ ପିତା ଅଟୁ। ଇସ୍ରାଏଲର ପର୍ବତସମୂହ ବିରୁଦ୍ଧରେ ତୁମ୍ଭର ସମସ୍ତ ନିନ୍ଦା ଆମ୍ଭେ ଶୁଣିଅଛୁ, “ସେହିସବୁ ଉତ୍ସନ୍ନ ହୋଇଅଛି, ଗ୍ରାସ କରିବା ନିମନ୍ତେ ଆମ୍ଭମାନଙ୍କୁ ଦିଆଯାଇଅଛି।” ତୁମ୍ଭେ ଆପଣା ମୁଖରେ ଆମ୍ଭ ବିରୁଦ୍ଧରେ ଦର୍ପ କଲ ଓ ଆମ୍ଭ ବିରୁଦ୍ଧରେ ଆପଣା କଥା ବହୁଳ କଲ; ଆମ୍ଭେ ତାହା ଶୁଣିଲୁ। ସାର୍ବଭୌମ ପିତା ଏହି କଥା କହନ୍ତି, ସମୁଦାୟ ପୃଥିବୀ ଆନନ୍ଦ କରିବା ସମୟରେ ଆମ୍ଭେ ତୁମ୍ଭକୁ ଧ୍ଵଂସସ୍ଥାନ କରିବା। ଇସ୍ରାଏଲ ବଂଶର ଅଧିକାର ଧ୍ଵଂସସ୍ଥାନ ହେବାରୁ ତୁମ୍ଭେ ଯେପରି ଆନନ୍ଦ କଲ, ସେପରି ଆମ୍ଭେ ତୁମ୍ଭ ପ୍ରତି କରିବା। ହେ ସେୟୀର ପର୍ବତ, ହେ ସମୁଦାୟ ଇଦୋମ, ତୁମ୍ଭେ ସମ୍ପୂର୍ଣ୍ଣ ରୂପେ ଧ୍ଵଂସସ୍ଥାନ ହେବ। ସେତେବେଳେ ସେମାନେ ଜାଣିବେ ଯେ ଆମ୍ଭେ ପିତା ଅଟୁ।