எசேக்கியேல் 35

35 ¹எங்கள் பிதாவின் வார்த்தை எனக்கு உண்டாகி:

²மனுஷகுமாரனே, சேயீர் மலைக்கு எதிராக உன் முகத்தைத் திருப்பி, அதற்கு விரோதமாகத் தீர்க்கதரிசனம் சொல். ³அதை நோக்கிச் சொல்லவேண்டியது: ஆண்டவராகிய பிதா சொல்லுகிறார்: “இதோ, சேயீர் மலையே, நான் உனக்கு விரோதமாயிருக்கிறேன்; நான் என் கையை உனக்கு எதிராக நீட்டி, உன்னைப் பாழாகவும் வெறுமையாகவும் ஆக்குவேன். ⁴உன் பட்டணங்களை நான் இடிபாடாக்குவேன், நீ பாழாய்ப் போவாய். அப்பொழுது நானே பிதாவானவர் என்று அறிந்துகொள்வாய்.

⁵நீ பூர்வகாலப் பகையை வைத்திருந்து, இஸ்ரவேல் புத்திரரை அவர்களுடைய ஆபத்தின் காலத்திலே, அவர்களுடைய கடைசி தண்டனை வந்த வேளையிலே, பட்டயத்துக்கு ஒப்புக்கொடுத்த படியினால்,” ⁶என் ஜீவனைக்கொண்டு சொல்லுகிறேன், நான் உன்னை இரத்தப்பழிக்கு ஒப்புக்கொடுப்பேன், இரத்தப்பழி உன்னைப் பின்தொடரும் என்று ஆண்டவராகிய பிதா உரைக்கிறார். நீ இரத்தச்சிந்துதலை வெறுக்காதபடியால், இரத்தப்பழி உன்னைப் பின்தொடரும். ⁷“சேயீர் மலையை நான் பாழும் வெறுமையுமாக்கி, அதிலே போக்குவரவாய் இருக்கிற யாவரையும் அறுத்துப்போடுவேன். ⁸அதின் மலைகளை வெட்டுண்டவர்களால் நிரப்புவேன்; உன் குன்றுகளிலும், பள்ளத்தாக்குகளிலும், உன் எல்லா ஓடைகளிலும் பட்டயத்தால் கொல்லப்பட்டவர்கள் விழுவார்கள். ⁹உன்னை நித்திய பாழிடமாக்குவேன்; உன் பட்டணங்கள் குடியில்லாமல் கிடக்கும். அப்பொழுது நானே பிதாவானவர் என்று அறிந்துகொள்வீர்கள்.

¹⁰‘இந்த இரண்டு ஜாதிகளும், இந்த இரண்டு தேசங்களும் என்னுடையதாகும்; அவைகளை நாம் கைப்பற்றுவோம்’ என்று—எங்கள் பிதா அங்கே இருந்தும்—நீ சொன்னபடியால்,” ¹¹ஆகையால், என் ஜீவனைக்கொண்டு சொல்லுகிறேன், நீ இஸ்ரவேலை வெறுத்து காண்பித்த உன் கோபத்துக்கும் பொறாமைக்கும் தக்கதாய் நான் உனக்குச் செய்வேன்; உன்னை நான் நியாயந்தீர்க்கும்போது இஸ்ரவேல் புத்திரருக்குள்ளே என்னை அறியப்பண்ணுவேன் என்று ஆண்டவராகிய பிதா உரைக்கிறார்.

¹²அப்பொழுது நானே பிதாவானவர் என்று அறிந்துகொள்வாய். ‘அவைகள் பாழாக்கப்பட்டன, நமக்கு விழுங்குவதற்குக் கொடுக்கப்பட்டன’ என்று இஸ்ரவேலின் மலைகளுக்கு விரோதமாய் நீ சொன்ன உன் நிந்தைகளையெல்லாம் நான் கேட்டேன். ¹³நீ உன் வாயினால் எனக்கு விரோதமாய்ப் பெருமைபாராட்டி, எனக்கு விரோதமாய் உன் வார்த்தைகளைப் பெருகப்பண்ணினாய்; அதை நான் கேட்டேன். ¹⁴ஆண்டவராகிய பிதா சொல்லுகிறார்: பூமியனைத்தும் மகிழ்ச்சியாயிருக்கும்போது, நான் உன்னைப் பாழாக்குவேன். ¹⁵இஸ்ரவேல் வம்சத்தாரின் சுதந்தரம் பாழாய்ப் போனதைக்குறித்து நீ மகிழ்ந்தபடியே, நான் உனக்குச் செய்வேன். சேயீர் மலையே, ஏதோம் முழுவதுமே, நீ பாழாய்ப் போவாய். அப்பொழுது நானே பிதாவானவர் என்று அறிந்துகொள்வார்கள்.